Имрӯз, санаи 10.09.2021 бо иштироки Раиси ноҳияи Айнӣ Муқим Муродзода Сардори Раёсати молия дар ноҳияи Айнӣ ба хотири ба синни нафақа расиданаш ба истироҳат гуселонида шуд. Дар маросими гусели Анвар Афзалиён ба нафақа ҳамчунин муовини сардори Сарраёсати молия дар вилояти Суғд Мақсудҷон Усмонзода, сардори шӯъбаи кор бо кадрҳои Сарраёсати молия дар вилояти Суғд Матлубахон Ҳасанова, сармутахассиси Раёсати хазинадории Сарраёсати молия дар вилояти Суғд Зариф Очилӣ, роҳбари дастгоҳи раиси ноҳияи Айнӣ Шаҳрулло Олмаҳмадзода ва тамоми кормандони Раёсати молия дар ноҳияи Айнӣ иштирок доштанд.
Бояд тазаккур дод, ки Анвар Афзалиён соли 1980 баъди хатми факултаи иқтисодии Университети давлатии Тоҷикистон ба номи В.И.Ленин (алҳол Донишгоҳи миллии Тоҷикистон), бо ихтисоси молия ва қарз фаъолияти меҳнатиашро дар Идораи молияи вилояти Ленинобод (имрӯза Суғд) оғоз бахшида, баъди ду сол ба ноҳияи Айнӣ омад ва ба ҳайси сардори шӯъбаи банақшагирии буҷети маҳаллӣ (алҳол Раёсати молияи ноҳия) фаъолият дошт. Дере нагузашта ӯро муовини сардори шӯъбаи маблағгузории хочагии халқи идораи молияи вилоят таъин карданд. Соли 1984-ум Анвар Афзалиён боз ба зодгоҳаш, яъне ба ноҳияи Айнӣ баргашта, ба ҳайси муовини сардор — Сардори шӯъбаи даромадҳои давлатии шӯъбаи молияи ноҳияи Айнӣ фаъолияти кориашро идома дод. Сипас ӯро ба вазифаи роҳбари Мақомоти андози ноҳияи Айнӣ таъин карда, баъди 10 соли фаъолият дар Мақомоти андоз, бо назардошти таҷрибаи кофӣ ва хислатҳои беҳтарини инсонӣ Анвар Афзалиёнро сардори Раёсати молия дар ноҳияи Айнӣ таъин карданд ва бештар аз 20 сол дар ин кори пурмасъулият ифои вазифа намуд. Вобаста ба фаъолияти муҳтарам Анвар Афзалиён ба ҳайси роҳбари Мақомоти маҳаллии молия аз соли 2012 ноҳияи Айнӣ аз субвенсияи буҷети вилоятӣ бароварда шуд, ки ин нишондод дар замони соҳибистиқлолии кишвар муваффақияти назаррас мебошад. Албатта сабаби асосии аз субвенсия баромадани ноҳияи Айнӣ ин бо дастгирии бевоситаи Ҳукумати Ҷумҳурии Тоҷикистон ва шахсан Асосгузори сулҳу ваҳдати миллӣ — Пешвои миллат, Президенти Ҷумхурии Тоҷикистон муҳтарам Эмомалӣ Раҳмон, дар ноҳия таъсис дода шудани корхонаҳои калони саноати кӯҳӣ бо ҷалби сармоягузориҳои мустақим мебошад, ки дар натиҷа манбаи даромади ноҳия ба маротиб афзуда, ноҳияи Айнӣ на танҳо аз субвенсия бароварда шуд, балки имрӯзҳо ҳиссагузор ба буҷетҳои ҷумҳуриявию вилоятӣ мебошад. Аз тарафи дигар, дуруст ба роҳ мондани сиёсати буҷети андоз дар ноҳияи Айнӣ низ ба ин мусоидат намуд, ки дар он муҳтарам Анвар Афзалиён низ саҳми муносиб дорад.
Раиси ноҳия зимни суханронӣ дар маросими гусел ба нафақаи ин шахсияти барӯманди диёр афзуд, ки: -“Анвар Афзалиён дар Мақомоти молияи вилоят ва ноҳияи Айнӣ бештар аз 40 сол фаъолият бурда, танҳо бо меҳнати ҳалол ва ҷустуҷӯи имкониятҳо ҷиҳати беҳдошти фаъолияти Мақомоти молия кор кард ва маҳз бо ҳамин хислату хоксорӣ ӯ ба эҳтирому муҳаббати ҳамкорон сазовор гардид. Давоми фаъолият дар Мақомоти молия ва андоз Анвар Афзалиён ба даҳҳо нафар шогирд асрори касб омӯзонд ва онҳоро дар рӯҳияи ватандӯстиву хештаншиносӣ тарбия намуд. Дар давоми фаъолияти корӣ Анвар Афзалиён бо Фармони Президенти Ҷумҳурии Тоҷикистон аз 30-юми августи соли 2002, №869 бо медали Хизмати шоиста мукофотонида шуда, инчунин бо Фармони Вазорати молияи Ҷумҳурии Тоҷикистон аз 5-уми сентябри соли 2017, №120 бо Нишони фахрии Аълочии молияи Ҷумҳурии Тоҷикистон мукофотонида шуда аст”.
Муовини сардори Сарраёсати молия дар вилояти Суғд Мақсудҷон Усмонзода аснои гусел қайд намуд, ки “Дар оғози сухан мехоҳам Шуморо бо Фармони Президенти Ҷумҳурии Тоҷикистон, Пешвои муаззами миллат дар бораи ба хизматчиёни давлатӣ додани рутбаи тахассусӣ шинос намоям.
Фармони Президенти Ҷумҳурии Тоҷикистон аз 23 августи соли 2021, №232 “Дар бораи ба хизматчиёни давлатӣ додани рутбаҳои тахассусӣ”.
Мутобиқи моддаи 69 Конститутсияи Ҷумҳурии Тоҷикистон фармон медиҳам:
Ба Афзалиён Анвар Ҳасан — сардори Раёсати молия дар ноҳияи Айнӣ рутбаи тахассусии мушовири давлатии дараҷаи 3 дода шавад.
Президенти Ҷумҳурии Тоҷикистон Эмомалӣ Раҳмон, шаҳри Душанбе, 23 августи соли 2021.
Ҳамчунин дар арафаи Рӯзи Истиқлолияти давлатӣ бо фармоиши Сарраёсати молия дар вилояти Суғд аз 7 сентябри соли 2021, №53 барои саҳми арзанда дар рушди иқтисодиёт ва татбиқи босамари сиёсати молияи давлатӣ, фаъолияти тӯлонии бенуқсон, ширкати фаъолона дар тарбияи кадрҳои соҳаи молия ва нишондиҳандаҳои назарраси меҳнатӣ, бахшида ба 30 — солагии Истиқлолияти давлатии Ҷумҳурии Тоҷикистон Афзалиён Анвар Ҳасан бо сипосномаи Сарраёсати молия дар вилояти Суғд сарфароз гардонида шуданд ва ҳоло ман бо иҷозати Шумо сипосномаи мазкурро ба муҳтарам Афзалиён Анвар Ҳасан месупорам.
Боиси ифтихору фараҳмандист, ки бо супориши Вазири молияи Ҷумҳурии Тоҷикистон муҳтарам Қаҳҳорзода Файзиддин Саттор ва сардори Сарраёсати молия дар вилояти Суғд муҳтарам Мирзозода Анвар Сайфиддинӣ ман дар ин чорабинӣ ширкат меварзам ва чун умри инсон вазифае, ки ману Шумо ишғол карда, дар ин ё он ҷода фаъолият мебарем, муваққатист. Мутассифона, имрӯз вақти он расид, ки мо инсони поквиҷдон, хоксору меҳрубон ва дилдодаи касб, сардори Раёсати молия дар ноҳияи Айнӣ Анвар Афзалиёнро ба нафақа гусел намоем.
Молиячиёни ноҳияи Айнӣ ва Сарраёсати молия дар вилояти Суғд Шумо, муҳтарам Анвар Афзалиёнро, чун мутахассиси кордону сермаҳсул, инсони хоксору меҳрубон, устоди бузург мешиносанд ва эҳтироматонро ҳамавақт ба ҷо меоваранд. Дар зиндагии имрӯза на ҳар касро насиб мешавад, ки дар як ҷомеаи меҳнатӣ солҳои тӯлонӣ кор карда, ба чунин обрӯву эътибор ва ифтихормандиву сарфарозӣ ноил гардад. Конуни Ҷумхурии Тоҷикистон “Дар бораи хизмати давлатӣ” моро водор мекунад, ки ҳарчанд иброз намудани чунин ҷумла осон нест, мо алҳол як ҳамкору ҳамнишин, маслиҳатгар ва раҳнамои молиячиёни ноҳияи Айнӣ Анвар Афзалиёнро ба нафақа гусел карда истодаем. Аз як ҷиҳат на ба ҳар кас муяссар мегардад, ки ба чунин рӯзи пирӯзӣ ва ба синну соли нафақа расида, дар вазъияти тантанавӣ ба нафақа гуселонида шавад. Аз тарафи дигар таҷриба, дониш ва малакае, ки Анвар Афзалиён доранд, бояд ба манфиати ҷомеа, барои тарбияи кадрҳои ҷавони соҳаи Мақомоти молияи ноҳия истифода бурда шаванд. Таманнои онро дорам, ки Анвар Афзалиён расман ба нафақа рафта истодаанд, аммо чун устод, ҳамкор, рафиқу бародар ва собиқадори Мақомоти молия ҳамеша бо мо ҳистанд. Орзу менамоям, ки ҳамеша танашон сиҳату хотирашон ҷамъ, рӯзгорашон осуда ва беҳтарин лаҳзаҳои зиндагӣ — даврони пирӣ насибашон гарданд. Мехоҳам аз номи сардори Сарраёсати молия дар вилояти Суғд муҳтарам Мирзозода Анвар Сайфиддинӣ, аз номи худам ва аз номи ҳамаи Шумо, ҳозирини гиромӣ, бори дигар ба муҳтарам Афзалиён Анвар Ҳасан барои меҳнати бенуқсон, заҳмату фаъолияташон дар рушди соҳаи молияи вилоят, аз ҷумла ноҳияи Айнӣ сипосмандӣ изҳор намоям дар ҳаёти минбаъдаашон хушиҳои зиндагиро таманно намоям”.