8 августи соли 2025 — Бо мақсади таҳкими иқтидори мудофиавии кишвар, тақвияти омодагии ҳарбӣ ва ҳифзи сарҳади давлатӣ, дар ноҳияи Айнӣ чорабинии муҳими ҳарбӣ-сиёсӣ оид ба омодабошии захираҳои сафарбарӣ ва қувваю воситаҳои мудофиаи ҳудудӣ баргузор гардид.
Чорабинӣ дар Фурудгоҳи марказии ноҳияи Айнӣ бо иштироки беш аз 6000 нафар шаҳрвандон аз ҳисоби ҳайати захиравӣ ва кормандони мақомоти ҳифзи ҳуқуқ таҳти бонги хатар доир гардида, сатҳи омодабошии ҷангии онҳо аз ҷониби мутахассисон ба таври ҳамаҷониба арзёбӣ карда шуд. Ҳамзамон, зиёда аз 500 адад техникаҳои гуногуни хоҷагии халқ дар ҳолати омодабошии баланди тактикӣ қарор дода шуданд.
Роҳбарии чорабиниро Сардори Ситоди генералии Қувваҳои Мусаллаҳ, Муовини якуми вазири мудофиаи Ҷумҳурии Тоҷикистон, генерал-майор Саидзода Бобоҷон Абдуқодир ба уҳда дошт. Ҳамзамон, чорабинии мазкур бо иштироки бевоситаи Раиси ноҳияи Айнӣ муҳтарам Равшан Раҳимзода сурат гирифт, ки бо суханронии ифтитоҳӣ ва изҳори сипос ба иштирокчиён ҳусни оғоз бахшид.
Мақсад ва аҳамияти чорабинӣ
Ҳадафи асосии чорабинии мазкур:
Санҷиши ҳолати омодабошии ҷангӣ ва сафарбарии умумӣ дар сатҳи ноҳия;
Мустаҳкам намудани ҳамоҳангии сохторҳои низомӣ ва ҳифзи ҳуқуқ;
Баланд бардоштани омодагии руҳиву равонӣ ва ҷисмонии шаҳрвандон;
Сайқал додани малакаҳои амалиётӣ ва ҳамкорӣ дар шароити эҳтимолии таҳдидҳои ҳарбӣ;
Пешгирии амалиётҳои диверсионию тахрибкорӣ аз тарафи гурӯҳҳои мусаллаҳ;
Омода намудани хадамоти комендантӣ ва ҳифзи иншооти муҳими давлатӣ.
Дар баромади хеш, генерал-майор Саидзода Бобоҷон Абдуқодир зикр намуд, ки дар шароити мураккаби ҷаҳонӣ ва минтақавӣ, амнияти давлат, сулҳу оромии ҷомеа, суботи сиёсӣ ва ваҳдати миллӣ масъалаҳои ҳаётан муҳим маҳсуб ёфта, ҳар як шаҳрванд вазифадор аст, дар ҳимояи Ватан саҳмгузор бошад. Ӯ инчунин ба зарурати муборизаи муассир бо хатарҳои муосир — терроризму экстремизм, қочоқи маводи мухаддир ва ҷиноятҳои муташаккили фаромиллӣ таъкид намуд.
Раиси ноҳияи Айнӣ Равшан Раҳимзода, зимни суханронии пурмуҳтавои худ таъкид кард, ки мардуми ноҳия дар ҳама ҳолат дар бари Сарфармондеҳи Олии Қувваҳои Мусаллаҳ, Президенти Ҷумҳурии Тоҷикистон муҳтарам Эмомалӣ Раҳмон истода барои ҳимояи сарзамини аҷдодӣ омодаанд. Ӯ гуфт: “Имрӯза ҷамъомади мо чорабинии ҳарбӣ-сиёсӣ буда, мақсад аз ташкил ва баргузории он — омодагӣ баҳри ҳифзи марзу буми Ватан, пойдории сулҳу суботи комил дар кишвари маҳбубамон мебошад.”
Равшан Раҳимзода афзуд, ки иштироки фаъолонаи шаҳрвандон, техника ва қувваҳои эҳтиётӣ далели ватандӯстӣ, садоқат ба давлат ва омодагӣ барои муқовимат ба ҳама гуна хатарҳои эҳтимолӣ мебошад.
Дар интиҳои чорабинӣ аз ҷониби Вазорати мудофиаи Ҷумҳурии Тоҷикистон як қатор волидони афсароне, ки фарзандони онҳо дар сафи Қувваҳои Мусаллаҳ хизмат мекунанд, бо Сипосномаҳо қадрдонӣ карда шуданд. Ин иқдом ба хотири арҷгузорӣ ба ҷасорату садоқати афсарон ва дастгирии рӯҳии онҳо анҷом дода шуд.
Ин чорабинӣ яке аз муҳимтарин машқҳои мудофиавӣ дар сатҳи вилоят ва ҷумҳурӣ ба ҳисоб меравад, ки бо сатҳи баланди ташкилӣ, иштироки васеи шаҳрвандон ва ҳадафҳои амиқи ватандӯстона доир гардид. Он нишон дод, ки ноҳияи Айнӣ ва мардуми он омодагии ҳамаҷониба доранд барои ҳифзи Истиқлоли давлатӣ, сарҳадоти кишвар ва суботи ҷомеа ҳамеша дар сафи аввал бошанд.
Маркази матбуоти мақомоти иҷроияи ҳокимияти давлатии ноҳияи Айнӣ
08.08.2025
и ещё 42
Статистика и объявления
Продвигать публикацию
Все реакции:
87
