Вохӯрии судманд

Субҳи 6-уми августи соли 2025 дар маҷлисгоҳи бинои Ҷамоати деҳоти Айнии ноҳияи Айнӣ вохӯрии фаъолона ва судманд баргузор гардид, ки дар он намояндаи Ҳукумати Ҷумҳурии Тоҷикистон, муовини сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон, Ардашер Мирзозода, иштирок дошт.

Дар ин вохӯрӣ муовини раиси ноҳия Фарҳод Мукаррамзода, муовини раиси Ҷамоати деҳоти Айнӣ Азаматшоҳ Зулфонов ва фаъолон аз 11 деҳаи ҳудуди ҷамоат ширкат варзиданд.

Маҳз бо ҳадафи иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар маҷлиси Ҳукумати Ҷумҳурии Тоҷикистон 31-уми июли соли 2025 ироа гардиданд, чунин мулоқот баргузор шуд.

Ардашер Мирзозода бо эҳсоси масъулияти баланд таъкид намуд, ки дар маҷлиси Ҳукумати Ҷумҳурии Тоҷикистон, санаи 31-уми июл, Пешвои миллат муҳтарам Эмомалӣ Раҳмон як қатор вазифаҳои муҳимро барои таҳкими амнияти озуқаворӣ, рушди соҳаҳои саноат ва энергетика, тақвияти низоми маориф ва тандурустӣ, пешгирии таъсири манфии тағйирёбии иқлим, омодагии ҷиддӣ ба мавсими тирамоҳу зимистони солҳои 2025-2026 ва инчунин омодасозӣ барои соли нави таҳсил дар солҳои 2025-2026 муайян намуданд.

Ҳамзамон, намоянда зикр дошт, ки бояд масъалаи фаҳмонидани муҳтавои қонунгузории кишвар ба шаҳрвандон ва субъектҳои хоҷагидорӣ оид ба ҷавобгарӣ дар ҳолатҳои истифодаи ғайриқонунии нерӯи барқ, ҷараёни дарав ва ҷамъоварии ҳосили зироатҳои кишоварзӣ, пешгирии сӯхтор, нигоҳдории маҳсулоти кишоварзӣ дар анборҳо ва сардхонаҳо, инчунин кишти такрорӣ ва захираи дусолаи маводи ғизоӣ дар ҳар оила зери назорат қарор гирад.Бо мақсади тарғиби ҳаёти намунавӣ ва пешбурди корҳои хайрхоҳона, ҷалби шахсони эҳсонкор ба корҳои ободонию ҳашар ва тозакорӣ низ муҳим арзёбӣ шуд. Беш аз ҳама, таваҷҷуҳ ба пешгирии бемориҳои сироятӣ ва нигоҳ доштани солимии ҷисмонӣ ва равонии сокинон таъкид гардид.

Муовини раиси ноҳия Фарҳод Мукаррамзода иброз дошт, ки Мақомоти иҷроияи маҳаллии ҳокимияти давлатии ноҳия дар ҳамбастагӣ бо сокинон ва фаъолон бо тамоми қувваю талош барои иҷрои дастуру супоришҳои Пешвои муаззами миллат муҳтарам Эмомалӣ Раҳмон омода ҳастанд ва баҳри татбиқи амалии онҳо ҷаҳду заҳмат хоҳанд кашид.

Ин вохӯрӣ дар рӯҳияи масъулиятшиносӣ ва ҳамдигарфаҳмӣ анҷом ёфт ва бешубҳа, ҳамчун як қадами муҳим дар пешрафти ҷамоат ва ноҳия дар самти амалигардонии ҳадафҳои стратегӣ хоҳад буд.