Рӯзи таъсисёбии Хадамоти давлатии оташнишонӣ дар ноҳияи Айнӣ таҷлил гардид

30-юми июли соли 2025 дар Қисми мустақили 64-уми ҳарбикунонидашудаи Хадамоти давлатии оташнишонӣ оид ба муҳофизати ноҳияи Айнӣ, бо иштироки Раиси ноҳия муҳтарам Равшан Раҳимзода ва роҳбарони мақомоти ҳифзи ҳуқуқу тартибот, чорабинии тантанавӣ бахшида ба Рӯзи таъсисёбии Хадамоти давлатии оташнишонӣ баргузор гардид.

Дар ин чорабинӣ ҳайати шахсии Хадамоти давлатии оташнишонӣ ва собиқадорони соҳа иштирок намуда, саҳми бузурги кормандони оташнишонӣ дар таъмини амният, ҳифзи ҷони инсонҳо ва молу мулки шаҳрвандонро махсусан зикр намуданд.

Раиси ноҳия Равшан Раҳимзода зимни суханронии худ таъкид кард, ки тибқи Қонуни Ҷумҳурии Тоҷикистон «Дар бораи рӯзҳои ид», ҳамасола 30-юми июл ҳамчун Рӯзи таъсисёбии Хадамоти давлатии оташнишонӣ таҷлил мегардад. Ин ниҳоди муҳими давлатӣ соли 1928 таъсис ёфта, тӯли тақрибан сад сол ҳамчун такягоҳи боэътимоди давлат ва ҷомеа дар мубориза бо сӯхторҳо ва пешгирии ҳолатҳои фавқулода фаъолият мекунад.

Раиси ноҳия изҳор дошт, ки дар даврони Истиқлоли давлатӣ, фаъолияти ин хадамот таҳти таваҷҷуҳи доимии роҳбарияти олии мамлакат, бахусус Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор гирифта, бо техника ва таҷҳизоти муосир таъмин гардида, сатҳи омодагии касбии кормандон пайваста баланд бардошта мешавад.

Бо татбиқи Барномаи давлатии таъмини бехатарӣ аз сӯхтор барои солҳои 2021–2025, сатҳи хизматрасонӣ ва имкониятҳои пешгирии сӯхторҳо дар ноҳияи Айнӣ низ беҳтар гардидааст. Рӯзи таъсисёбии Хадамоти давлатии оташнишонӣ танҳо ҷашни кормандони ин ниҳод набуда, балки рӯзи арҷгузорӣ ба касби пурмасъулият, фидокорона ва шуҷоатмандонаи онҳост. Ин сана баёнгари садоқат ба касб ва меҳру муҳаббат ба Ватан мебошад, ки метавонад барои насли ҷавон намунаи ибрат гардад.

Дар фарҷоми чорабинӣ, роҳбарони мақомоти ҳифзи ҳуқуқ бо суханони табрикотӣ ба кормандон ва собиқадорони соҳа баромад намуда, ба онҳо тансиҳатӣ, комёбиҳои хизматӣ ва рӯҳияи баланди масъулиятшиносӣ таманно карданд.

Ҳамчунин, як қатор кормандони фаъоли Қисми мустақили 64-уми ҳарбикунонидашудаи Хадамоти давлатии оташнишонӣ ва собиқадорони соҳа аз ҷониби Мақомоти иҷроияи ҳокимияти давлатии ноҳияи Айнӣ бо Сипоснома ва туҳфаҳои хотиравӣ қадрдонӣ карда шуданд.