Субҳи имрӯз, 29 июли соли 2025, Фатҳуллоева Юлдӯзахон — ғолиби озмуни байналмилалии IKO-2025 аз фанни забони англисӣ, ки аз шаҳри Пномпени Шоҳигарии Камбоҷа ба Ватан баргашт, дар Фурудгоҳи байналмилалии шаҳри Душанбе бо эҳтиром ва муҳаббат пешвоз гирифта шуд. Мавсуфа дар олимпиадаи мазкур Ҷумҳурии Тоҷикистонро бо сари баланд намояндагӣ намуда, дар арсаи байналмилалӣ парчами Ватанро баланд бардошт.
Нимаи дуюми ҳамин рӯз, дар назди бинои мақомоти иҷроияи ҳокимияти давлатии ноҳияи Айнӣ, маросими бошукӯҳе ба хотири қадрдонӣ аз ин дастовард баргузор гардид. Дар ин чорабинӣ Раиси ноҳия муҳтарам Равшан Раҳимзода иштирок намуда, ғолиби озмуни байналмилалии IKO-2025-ро шахсан табрику муборакбод гуфт.
Раиси ноҳия ба мураббиёну омӯзгорон, волидайн ва худи ғолиб арзи сипос намуда, зикр кард, ки ин дастоварди арзанда натиҷаи амалӣ гардидани Барномаи давлатии “Такмили таълим ва омӯзиши фанҳои забони русӣ ва англисӣ барои давраи то соли 2030” мебошад.
Равшан Раҳимзода ҳамзамон таъкид дошт, ки комёбиҳои хонандагони муассисаҳои таълимии ноҳия аз таваҷҷуҳу дастгириҳои ҳамешагии Пешвои муаззами миллат муҳтарам Эмомалӣ Раҳмон шаҳодат медиҳад.
Бо дастгириҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шашмоҳаи аввали соли 2025 ду муассисаи таълимӣ ва шаш муассисаи таҳсилоти томактабӣ бо иштироки бевоситаи Сарвари давлат мавриди истифода қарор дода шуданд. Айни ҳол сохтмони муассисаҳои нави таълимӣ, кӯдакистонҳо ва толору майдончаҳои варзишӣ дар деҳаҳои гуногуни ноҳия бомаром идома доранд.
Дар самти иҷрои Барномаи давлатии “Таъмини муассисаҳои таҳсилоти умумии Ҷумҳурии Тоҷикистон бо кабинетҳои муҷаҳҳази таълимӣ ва озмоишгоҳҳои фаннӣ” низ ноҳия ба пешравиҳои назаррас ноил гардида истодааст. Дар соли 2024 иҷроиши он ба 112,6% расонида шуда, дар нимсолаи аввали соли 2025 ба 90% баробар шудааст, ки ин омил ба баланд гардидани сифати таҳсилоти хонандагон мусоидат менамояд.
Натиҷаи ҳамин дастгириҳо буд, ки дар соли ҷорӣ 11 нафар хонандагони муассисаҳои таълимии ноҳия дар даври ҷумҳуриявии олимпиадаҳои фаннӣ ҷойҳои намоёнро ишғол намуда, бо медал ва дипломҳои ифтихорӣ сарфароз гардиданд. Дар соли таҳсили 2025–2026 аз миёни 1102 нафар хатмкунандаи синфи 11-и муассисаҳои таълимии ноҳия, 874 нафар тавассути Маркази миллии тестӣ ба муассисаҳои таҳсилоти олӣ роҳ ёфтанд. Ҳамчунин, 16 нафар тибқи Квотаи Президентӣ ба донишгоҳҳои бонуфузи кишвар дохил гардиданд.
Бидуни шак, ғалабаи Фатҳуллоева Юлдӯзахон дар олимпиадаи байналмилалии IKO-2025 оғози як марҳилаи тозаи муваффақиятҳо барои соҳаи маорифи ноҳияи Айнӣ мебошад. Бо чунин дастовардҳо, боварии комил дорем, ки дар оянда низ фарзандони соҳибистеъдоди ноҳия дар сатҳи байналмилалӣ парчамбардори Ватан хоҳанд шуд.
Статистика и объявления
Продвигать публикацию
Все реакции:
100
