Субҳи имрӯз, 13 августи соли 2025, дар деҳаи Рарзи ноҳияи Айнӣ маросими ботантанаи номгузорӣ ба ифтихори хизматҳои арзандаи собиқ сардухтури Беморхонаи минтақавии №3-и деҳаи Рарз, шодравон Ҳайдаров Маъмур Нарзуллоевич баргузор гардид.
Дар ин чорабинии хотирмон Раиси ноҳияи Айнӣ Раҳимзода Равшан ширкат варзида, зимни суханронии худ таъкид намуд, ки арҷгузорӣ ба шахсиятҳои хизматнишондода ва эҳтироми хотираи неки онҳо яке аз рукнҳои муҳими худшиносии миллӣ мебошад. Раиси ноҳия зикр кард:
«Бидуни арҷгузорӣ ба таърихи дирӯз, ягон миллат роҳи фардо ва дурнамои давлатдории худро ба таври устувор ба роҳ монда наметавонад. Дар давоми солҳои Истиқлоли давлатӣ бо шарофати сиёсати ояндабинонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо ба дастовардҳои назаррас ноил гардидем. Эҳтироми гузаштагон ва пос доштани хотираи неки онҳо яке аз таъкидҳои ҳамешагии Пешвои миллат мебошад. Ин гуна арҷгузориҳо, ки реша дар анъанаҳои наҷиби миллӣ доранд, барои боло бурдани маънавиёти ҷомеа, ташаккули ҷаҳонбинӣ, зебоиписандӣ ва эҳёи арзишҳои волои фарҳанги миллӣ, бахусус дар насли наврас нақши муҳим мебозанд».
Сипас, пайвандон, наздикон ва дӯстони шодравон Ҳайдаров Маъмур Нарзуллоевич хотираҳои неки худро дар бораи зиндагӣ ва фаъолияти пурсамари ӯ баён намуданд.
Маъмур Ҳайдаров 1 январи соли 1960 дар деҳаи Рарзи ноҳияи Айнӣ дар оилаи хизматчӣ ба дунё омада, соли 1967 таҳсили худро дар мактаби №3-и деҳа оғоз намуда, соли 1976 онро бо муваффақият хатм кардааст. Солҳои 1977–1979 дар курси тайёрии Донишгоҳи давлатии тиббии Тоҷикистон таҳсил намуда, соли 1979 ба Институти давлатии тиббии ба номи Абӯалӣ ибни Синои шаҳри Душанбе дохил гардидааст. Ӯ соли 1984 муассисаи мазкурро бо ихтисоси духтури дандон хатм намуда, солҳои 1984–1985 дар Беморхонаи шаҳрии №5-и шаҳри Душанбе давраи интернатураро гузаштааст.
Фаъолияти кории худро соли 1985 дар Беморхонаи минтақавии №5-и деҳаи Шаватки Боло оғоз намуда, аз соли 1986 то соли 1993 дар беморхонаҳои шаҳри Душанбе фаъолият кардааст. Соли 1993 ба деҳаи Рарз баргашта, бо дастгирии Мақомоти иҷроияи ҳокимияти давлатии ноҳия Беморхонаро бо фарогирии 20 кат таъсис дода, то соли 2018 дар вазифаи сардухтури Беморхонаи минтақавии №3 бо масъулияти баланд ва садоқати комил хизмат намудааст.
Дар зимн, Раиси ноҳияи Айнӣ аз Беморхонаи минтақавии №3 боздид намуда, як қатор кормандони соҳаи тандурустиро бо Сипосномаи Мақомоти иҷроияи ҳокимияти давлатии ноҳияи Айнӣ сарфароз гардонид.
Маросими имрӯза на танҳо нишони эҳтиром ба шахсият ва хизматҳои шоистаи шодравон Маъмур Ҳайдаров, балки ибрат барои насли ҷавон дар роҳи хизмат ба Ватан ва мардум мебошад.
Маркази матбуоти МИҲД ноҳияи Айнӣ
и ещё 29
Статистика и объявления
Продвигать публикацию
Все реакции:
108
