21 августи соли 2025, ноҳияи Айнӣ. Имрӯз дар Қасри фарҳанги ба номи Гулназар Келдии деҳаи Дар-Дар маҷлиси васеи кормандони соҳаи маорифи ноҳия баргузор гардид.
Дар кори маҷлис Раиси ноҳияи Айнӣ муҳтарам Равшан Раҳимзода иштирок ва суханронӣ намуданд.
Нахуст, Раиси ноҳия бо намоиши дастовардҳои хонандагони муассисаҳои таълимӣ, ғолибони олимпиадаҳо, озмунҳои ҷумҳуриявию байналмилалӣ, мусобиқаҳои варзишӣ ва эҷодкорони навовар шинос гардида, ба онҳо изҳори сипос ва миннатдорӣ баён карданд.
Сипас баъди садо додани Суруди миллии Ҷумҳурии Тоҷикистон кори маҷлис оғоз ёфт. Мудири шуъбаи маорифи ноҳия ҳисоботи муфассал оид ба бурду бохти соҳаи маориф дар солҳои таҳсили 2024–2025 ироа намуд. Ҳамзамон намояндаи Раёсати маорифи вилояти Суғд, корманди маркази таълимию методӣ Зубайдуллозода Ибодулло вобаста ба фаъолияти маорифи ноҳия изҳори андеша намуд.
Дар идома, Раиси ноҳия муҳтарам Равшан Раҳимзода таъкид карданд, ки дар даврони Истиқлоли давлатӣ мақому манзалати устодону олимон боло рафта, ин аз ғамхориҳои Пешвои миллат муҳтарам Эмомалӣ Раҳмон шаҳодат медиҳад.
Ҳамчунин бо иқтибос аз суханони Пешвои муаззами миллат иброз гардид:
«Миллате, ки омӯзгори асил надорад, ҳеҷ гоҳ ба ягон мартаба намерасад. Ифтихор ва сари баланди мост, ки тоҷикон аз қадим соҳиби китобу қалам, илму маърифат ва олиму омӯзгор буданд, ҳастанд ва дар оянда низ ин маърифати бузурги худро идома хоҳанд дод».
Зикр шуд, ки маориф манбаи асосии рушди миллӣ буда, устувории ҳаёти маънавӣ ва ягонагии миллат аз саҳми омӯзгорон вобаста аст.
Дар ҷараёни маҷлис иттилоъ дода шуд, ки дар доираи сафари кории Пешвои миллат ба ноҳияи Айнӣ як қатор иншооти таълимӣ ва томактабӣ мавриди истифода қарор гирифтанд. Аз ҷумла:
-бинои нави МТМУ №52 дар деҳаи Дар-Дар барои 240 ҷойи нишаст, бо дастгирии соҳибкори ватандӯст Исрофилов Зинҳор;
-муассисаи таълимӣ дар деҳаи Ваҳдатобод барои 264 ҷойи нишаст, бо маблағгузории мақомоти иҷроияи ҳокимияти давлатии ноҳия;
-муассисаи таҳсилоти томактабии №6 барои 120 кӯдак, бо маблағгузории мақомоти иҷроияи ҳокимияти давлатии вилояти Суғд;
-муассисаҳои таҳсилоти томактабӣ дар деҳаҳои Зоосун, Каздон, Анзоб, Хайробод ва Ваҳдатобод бо саҳмгузории соҳибкорони маҳаллӣ (бо тариқи маҷозӣ).
Ҳоло сохтмони муассисаҳои нави таълимӣ ва варзишӣ идома дорад, аз ҷумла:
МТМУ №11 деҳаи Фатмев барои 320 ҷойи нишаст;
МТМУ №37 аз ҷониби КФ «Шахтаи Фон-Яғноб»;
МТМУ №26 аз ҷониби КМ «Тоҷикистону Амрико»;
таъмири пурраи МТМУ №9 деҳаи Такфон бо дастгирии Ширкати металлургии Анзоб (АМКО);
сохтмони майдончаҳои варзишӣ дар назди МТМУ №47 (деҳаи Пасрӯд), МТМУ №4 (деҳаи Дар-Дар), МТМУ №13 (деҳаи Вешаб) ва толори варзишии МТМУ №36 (деҳаи Канте).
Ҳамчунин, майдончаи варзишии МТМУ №16 деҳаи Шаватки Боло бо маблағгузории мақомоти иҷроияи ҳокимияти давлатии ноҳия мавриди истифода қарор гирифт.
Дар анҷом, омӯзгорони пешқадам бо нишони сарисинагии «Аълочии маориф ва илми Ҷумҳурии Тоҷикистон», сипосномаҳо, ифтихорномаҳо ва туҳфаҳои хотиравӣ қадрдонӣ шуданд. Муассисаи таҳсилоти миёнаи умумии №20 деҳаи Мадм ҳамчун «Муассисаи сол» эътироф гардид ва бо сипоснома ва туҳфаҳои Раиси ноҳия сарфароз шуд.
Пас аз маҷлис, аҳли маорифи ноҳия аз МТМУ №52 ба номи Исроил Исрофилов ва Муассисаи томактабии №9 «Бунафша», ки бо саҳмгузории соҳибкори маҳаллӣ Исрофилов Зинҳор сохта шудаанд ва бо иштироки Пешвои миллат рӯзи 13 июл ифтитоҳ гардиданд, боздид карданд.
Дар ҳузури аҳли маориф ва фаъолони ноҳия Раиси ноҳия ба соҳибкор Исрофилов Зинҳор Сипосномаи мақомоти иҷроияи ҳокимияти давлатии ноҳия тақдим намуд.
Дафтари матбуоти Раиси ноҳияи Айнӣ
и ещё 43
Статистика и объявления
Продвигать публикацию
Все реакции:
68
