Боздиди Раиси ноҳияи Айнӣ аз Муассисаи томактабии №8 ва баргузории ҷамъомади тантанавӣ дар деҳаи Каздон

Муассисаи томактабии №8, деҳаи Каздон

Ин муассисаи томактабӣ бо ташаббуси фарзандони ватандӯсти деҳа бунёд гардида, дар доираи сафари кории Пешвои миллат муҳтарам Эмомалӣ Раҳмон ба ноҳияи Айнӣ ба таври маҷозӣ мавриди истифода қарор дода шуда буд. Айни замон дар муассиса зиёда аз 80 кӯдак ба таълиму тарбия фаро гирифта шуда, ҳуҷраҳои барҳаво ва шароити мусоиди таълимӣ имконият фароҳам меоранд, ки дар оянда теъдоди кӯдакон зиёдтар гардад.

Раиси ноҳия аз шароити фароҳамшуда изҳори қаноатмандӣ намуда, омӯзгорону кормандони боғчаро барои саҳмгузорӣ дар таълиму тарбияи насли наврас таҳсин кард. Зимнан, дастур дода шуд, ки бо мақсади беҳтар намудани фазои таълимӣ, маводи бозича, аёният ва лавозимоти кӯдакона пурра таъмин карда шавад.

Сипосгузорӣ ба саҳмгузорон ва фаъолони деҳа

Ҳамзамон дар деҳаи Каздон бо иштироки Раиси ноҳия ва сокинони ҷамоат ҷамъомади тантанавӣ баргузор гардид. Зимни суханронӣ, Раиси ноҳия мардуми сарбаланди деҳаро ба муносибати фарорасии ҷашни 35-солагии Истиқлоли давлатӣ табрик намуда, таъкид кард, ки неъмати соҳибистиқлолӣ амсоли ганҷи бебаҳоест, ки бояд бо аҳлӣ, меҳнату фидокорӣ ҳифз ва пос дошта шавад.

Бо қарор ва ибтикори Мақомоти иҷроияи ҳокимияти давлатии ноҳия ба як қатор шахсони фаъол, саҳмгузорон ва ташкилотчиёни корҳои ободонӣ **Арзи сипос** ва **Сипосномаҳои расмӣ** тақдим карда шуд. Ин иқдом бо ҳадафи қадршиносӣ аз заҳмату содиқӣ ва таҳкими ҳисси ватандӯстӣ миёни сокинон роҳандозӣ гардид.

Раиси ноҳия дар анҷом изҳор дошт, ки мардуми деҳот ҳамчун такягоҳи давлат дар ҳама давру замон рисолати таърихии худро дар ободкорӣ, рушду пешрафти деҳаҳо ва тарбияи насли солим ба таври шоиста иҷро кардаанд. Вай аз аҳолӣ даъват ба амал овард, ки минбаъд низ бо дастгирии сиёсати хирадмандонаи Пешвои миллат муҳтарам Эмомалӣ Раҳмон дар роҳи созандагӣ ва бунёдкорӣ саҳми боз ҳам арзанда гузоранд.

Маркази матбуоти МИҲд-и ноҳияи Айнӣ