2-юми апрели соли 2025 гуруҳи аввалини ҷавонони синни даъватии ноҳияи Айнӣ, ҷавонони ватандӯсту шуҷоатманди деҳот, ки ихтиёран, бо амри дилу виҷдон азми хизмати Модар – Ватан кардаанд, ботантана ба хизмати ҳарбӣ гуселонида шуданд.
Ба ин муносибат дар майдони назди Нишони давлатии Ҷумҳурии Тоҷикистон дар ноҳияи Айнӣ бо иштироки роҳбарияти мақомоти иҷроияи ҳокимияти давлатӣ, раисони ҷамоатҳои шаҳраку деҳот, кормандони комиссариати ҳарбӣ, масъулини мизҳои ҳарбии ҷамоатҳои шаҳраку деҳот, собиқадорони ҷангу меҳнат ва волидайну пайвандони ҷавонони адои хизмати Модар-Ватанро ихтиёрнамуда ҳамоиши тантанавӣ баргузор гардид.
Чорабинӣ бо садо додани Суруди миллии Ҷумҳурии Тоҷикистон оғоз гардид.
Раиси ноҳия Рӯзибой Раҳимзода зимни суханронии хеш изҳор дошт, ки имрӯз вобаста ба Фармони Президенти Ҷумҳурии Тоҷикистон аз 19-уми феврали соли 2025 таҳти №967 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007” мо ҷавонони шуҷои ноҳияро ба сафи Қувваҳои Мусаллаҳи мамлакат гусел менамоем ва ин албатта аз оғози нек ва муташаккилонаи маъракаи даъватӣ башорат медиҳад.
Дар ин лаҳзаҳои хотирмон мехоҳам ба ҷавононе, ки хизмат дар сафи Қувваҳои Мусаллаҳи Ҷумҳурии Тоҷикистонро вазифа ва қарзи шаҳрвандии худ дониста, имрӯз озими адои хизмати ҳарбӣ шуда истодаанд, изҳори эҳтиром намуда ба онҳо дар адои қарзи шаҳрвандӣ, ҳимояи марзу буми кишвар роҳи сафед ва барору кушоиш таманно намоям. Ҳамчунин, ба падару модароне, ки чунин фарзандони бонангу ор ва ҷасуру ватанпарварро тарбияю ба камол расонидаанд баёни эҳтирому сипос мекунам.
Имрӯз Қувваҳои Мусаллаҳи Ҷумҳурии Тоҷикистон аз лиҳози таъминоти моддию техникӣ, қудрату маҳорати ҳарбӣ ва низоми ҳайати шахсӣ аз солҳои пешин афзалият дорад ва мо ифтихор аз он дорем, ки ҷавонони ноҳияи Айнӣ низ дар таъмини сулҳу оромӣ ва амнияти кишвар саҳми назаррас доранд. Онҳо дар ҷузъу томҳои Артиши миллӣ сарбаландона хизмат намуда, аз мактаби бузурги матонат ва ҷавонмардӣ сабақ меомӯзанд.
Ҳукумати мамлакат барои боз ҳам баланд бардоштани қудрати мудофиавии кишвар тамоми чораҳои лозимаро меандешад. Сарфармондеҳи Олии Қувваҳои Мусаллаҳи Ҷумҳурии Тоҷикистон, Президенти Ҷумҳурии Тоҷикистон, муҳтарам Эмомалӣ Раҳмон баҳри баланд бардоштани обрӯву эътибори Артиши миллӣ мустаҳкам намудани иқтидори мудофиавии кишвар ғамхориҳои зиёд зоҳир менамоянд.
Ин ғамхориҳои пайваста, мо калонсолон ва падару модаронро водор менамояд, ки фарзандонамон хусусан, наврасону ҷавононро дақиқ фаҳмонем, ки бозичаи дасти дигарон ва иҷрокунандаи иродаи доираҳои ғаразнок нашаванд. Зеро Тоҷикон ҳамчун яке аз миллатҳои қадимтарини дунё таърихан мардуми сулҳхоҳу таҳаммулгаро, фарҳангиву тамаддунсоз ва ватандӯсту ватанпараст шинохта шудаанд.
Сипас, даъватшаванда Соҳиб Оқилзода Ҷамоати деҳоти Урметан ва падари даъватшаванда аз Ҷамоати шаҳраки Зарафшон Наҷмиддин Юнусов баромад намуданд.
Гуфта шуд, ки барои насли ҷавон яке аз муҳимтарин мактаби обутоб хизмат дар сафи Қувваҳои мусаллаҳи мамлакат аст. Маҳз дар ҳамин ҷо ҷавонписарон шуҷоату мардонагӣ омӯхта, муқаддастарин арзиши ҳаёт, дӯст доштан ва содиқона муҳофизат кардани хоки поки Ватани азизро ёд мегиранд.
Ёдовар мешавем, ки бо дастгирии Раиси ноҳияи Айнӣ Рӯзибой Раҳимзода ихтиёриёни хизмати ҳарбӣ дар Ташкилоти ҷамъиятии “Мададгори мудофиа” таҳсил намуда, соҳибкасб гардиданд ва дар фазои тантанавӣ “Гувоҳнома”- и ронандагии онҳо супорида шуд.
Ҳамчунин, чун анъана маросими нонгазонӣ сурат гирифта, дар охир барномаи фарҳангии хубу хотирмон пешкаши иштирокчиён гардонида шуд.
Дафтари матбуоти Раиси ноҳияи Айнӣ
