«Машварат идроку ҳушёрӣ диҳад»
Тибқи дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар маҷлиси васеи Кумитаи Иҷроияи Марказии Ҳизби Халқии Демократии Тоҷикистон аз 17 июли соли 2025 баён гардиданд, ва дар асоси нақшаи гурӯҳи кории Мақомоти иҷроияи ҳокимияти давлатии вилояти Суғд, ки бо қарори Раиси вилоят муҳтарам Раҷаббой Аҳмадзода аз 21 июли соли 2025 тасдиқ шудааст, санаи 12 августи соли 2025 гурӯҳи кории вилоятӣ таҳти роҳбарии муовини Раиси вилояти Суғд муҳтарам Исмоилзода Зуфар Муртазохон ба ноҳияи Айнӣ сафари корӣ анҷом дод.
Ҳадаф аз ташрифи гурӯҳи корӣ омӯзиши вазъи татбиқи сиёсати идеологӣ ва муқовимат бо равандҳои номатлуби ҷаҳони муосир, аз ҷумла ифротгароӣ ва терроризм, тақвияти фаъолияти таблиғотию ташвиқотӣ ҷиҳати гиромидошти арзишҳои миллӣ, фарҳанг ва суннатҳои пурғановати халқи тоҷик, инчунин баҳогузорӣ ба сатҳи иҷрои нақшаи муштараки корҳои идеологӣ аз рӯйи усулҳои «деҳа ба деҳа», «маҳалла ба маҳалла» ва «хона ба хона» мебошад.
Зимни боздиди худ гурӯҳи корӣ фаъолияти як қатор сохторҳои дахлдори ноҳиявиро, аз ҷумла Мақомоти иҷроияи ҳокимияти давлатии ноҳияи Айнӣ, бахши кор бо ҷавонон ва варзиши ноҳия, бахши дин, танзими анъана ва ҷашну маросимҳо, шуъбаи Агентии меҳнат ва шуғли аҳолӣ дар ноҳия, Кумитаи иҷроияи ҲХДТ дар ноҳияи Айнӣ ва ҷамоатҳои деҳоти Айнӣ ва Дар-Дар мавриди омӯзиш ва таҳлил қарор дод.
Пас аз анҷоми боздид, дар толори Мақомоти иҷроияи ҳокимияти давлатии ноҳияи Айнӣ машварати корӣ бо иштироки Раиси ноҳия Раҳимзода Равшан ва муовини Раиси вилояти Суғд Исмоилзода Зуфар баргузор гардид.
Дар ҷараёни машварат, пас аз шунидани гузоришҳо оид ба фаъолият ва нақшаҳои амалии сохторҳои марбута, муовини Раиси вилоят ба масъалаҳои зерин таъкид намуд:
идомаи вохӯриҳо бо аҳолӣ аз рӯйи усулҳои «деҳа ба деҳа», «маҳалла ба маҳалла», «хона ба хона» ва минбаъд «мактаб ба мактаб», «масҷид ба масҷид»;
истифодаи самараноки заминҳои наздиҳавлигӣ ва ташаккули фарҳанги истеҳсолу захираи маҳсулоти хӯрокворӣ барои ду сол;
омодагии ҳамаҷониба ба даъвати ҳарбии тирамоҳии соли 2025;
ҷалби ҷавонон ба варзиш ва тақвияти рушди инфрасохтори варзишӣ;
риояи дақиқи муқаррароти Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон»;
вусъати корҳои ҳуҷҷатнигорӣ, таҳияи нақшаҳои муфассали таблиғотию тарбиявӣ ва ҷалби кадрҳои баландихтисос ба соҳаҳои муҳими ҳаёти ҷомеа;
иҷрои саривақтӣ ва босифати дастуру супоришҳои Пешвои миллат.
Дар интиҳо ба масъулин тавсия ва супоришҳои мушаххас дода шуд, то фаъолияти идеологиро дар самтҳои зикршуда боз ҳам тақвият бахшида, барои таҳкими маърифати сиёсӣ ва худшиносии миллӣ дар миёни аҳолӣ, бахусус наврасону ҷавонон, саҳми бештар гузоранд.
Равшан Раҳимзода чунин машварати кории гурӯҳиро муҳим арзёбӣ карда, таъкид дошт, ки дар кӯтоҳтарин муддат камбудиҳои ҷойдоштаи бартараф хоҳанд шуд.
Маркази матбуоти Мақомоти иҷроияи ҳокимияти давлатии ноҳияи Айнӣ
12 августи соли 2025
и ещё 18
Статистика и объявления
Продвигать публикацию
Все реакции:
43
