Идомаи корҳои ободонӣ дар ноҳияи Айнӣ

Дар партави сиёсати созандаву бунёдкоронаи Пешвои миллат, муҳтарам Эмомалӣ Раҳмон, бахшида ба сазовор пешвоз гирифтани ҷашни 35-солагии Истиқлоли давлатии Ҷумҳурии Тоҷикистон, корҳои омодагӣ ба ин ҷашни бузурги миллӣ дар ноҳияи Айнӣ вусъати тоза пайдо намудаанд.

Дар доираи тадбирҳои ободонию созандагӣ ба истиқболи ҷашни 35-солагии Истиқлоли давлатии Ҷумҳурии Тоҷикистон дар ноҳияи Айнӣ бунёду навсозии як қатор иншоот ба нақша гирифта шуда, то имрӯз натиҷаҳои назаррас ба даст омадаанд.

Дар маҷмӯъ, 595 адад иншооти ҷашнӣ пешбинӣ гардида, то имрӯз наздики 88,2 фоизи он бо таъсиси 652 ҷойи нави корӣ мавриди баҳрабардорӣ қарор гирифтааст.

Бо ҳамкории мақомоти иҷроияи ҳокимияти давлатии ноҳияи Айнӣ ва иштироки фаъолонаи сокинони ватандӯсти ноҳия сохтмони як қатор иншооти муҳими иҷтимоӣ идома дорад. Аз ҷумла, дар назди Муассисаи таҳсилоти миёнаи умумии №3-и деҳаи Рарзи Ҷамоати деҳоти Рарзи ноҳия бо ташаббуси МИҲД-и ноҳия ва дастгирии сокинони маҳаллӣ сохтмони майдончаи варзишӣ бо дарозии 60х30 метр (масоҳати 18 сотих) оғоз ёфтааст. Айни замон сохтмончиён атрофи майдончаи варзиширо гирдбаст намуда истодаанд. Ин иқдом ба ҷалби наврасону ҷавонон ба варзиш ва ҳифзи саломатии онҳо мусоидат хоҳад кард.

Раиси ноҳияи Айнӣ Равшан Раҳимзода ба масъулин ва сохтмончиён дастур дод, ки дар бунёди майдончаи варзишӣ аз стандартҳои замони муосир истифода бурда, онро ба талаботи рӯз ҷавобгӯ созанд. Ин иқдомҳо аз таваҷҷуҳ ва дастгирии пайвастаи Роҳбарияти Олии мамлакат муҳтарам Эмомалӣ Раҳмон сарчашма мегиранд.

Сипас, Равшан Раҳимзода аз интихоби ҷой барои сохтмони синфхонаҳои иловагӣ дар назди Муассисаи таҳсилоти миёнаи умумии №29-и деҳаи Гузари Бод дидан кард. Бо афзоиши шумораи аҳолӣ зарурати сохтмони боз 4 синфхонаи иловагӣ ба миён омадааст. Ин синфхонаҳо бо дастгирии мақомоти иҷроияи ҳокимияти давлатии ноҳия ва саҳми сокинони деҳа бунёд мегарданд. Раиси ноҳия интихоби ҷойро муносиб арзёбӣ намуда, барои оғози фаврии корҳои сохтмонӣ ба масъулин супоришҳои мушаххас дод. Ҳамчунин, таъкид гардид, ки дар рафти сохтмон масолеҳи босифат истифода шуда, корҳои бунёдӣ дар муҳлати муқарраргардида анҷом дода шаванд.

Дар идома, Раиси ноҳия аз ҷараёни сохтмони Маркази хизматрасонӣ дар мавзеи Қалъаи Томин боздид намуд. Тибқи нақша, соҳибкор Сафаров Муҳсин ният дорад дар ошёнаи якум маркази савдо аз қабили: мағозаҳои либосворӣ, ашёҳои рӯзғордорӣ, мағозаи хӯрокворӣ ва дар ошёнаи дуюм туйхона ташкил намояд. Бо бунёд гардидани ин марказ зиёда аз 20 нафар соҳиби ҷойи кори доимӣ ва маоши хуб таъмин мегарданд.

Раиси ноҳия барои саҳмгузории арзандаи соҳибкор дар корҳои ободонӣ ва созандагии диёр изҳори миннатдорӣ карда, иҷрои босифат ва саривақтии корҳоро таъкид намуд.

Ҳамчунин, Равшан Раҳимзода аз рафти корҳои сохтмонии муассисаи томактабии деҳаи Томин боздид кард. Ёдовар мешавем, ки аз ҷониби МИҲД-и ноҳия дар якҷоягӣ бо сокинони ватандӯсти деҳаи Томин муассисаи томактабӣ сохта шуда истодааст. Айни замон корҳои такдевории муассиса оғоз гардида, сокинон ният доранд то охири сол иншоотро ба итмом расонад.

Раиси ноҳия аз иқдоми маорифпарваронаи сокинони деҳаи Томин изҳори қаноатмандӣ намуда, миннатдории мақомоти иҷроияи ҳокимияти давлатии ноҳияи Айниро ба онҳо расонид.

Маркази матбуоти МИҲД ноҳияи Айнӣ