Паёми табрикотии Раиси ноҳияи Айнӣ Равшан Раҳимзода бахшида ба Рӯзи кормандони соҳаи тандурустӣ

Муҳтарам кормандони соҳаи тиб!

Бо камоли самимият Шуморо ба ифтихори Рӯзи кормандони соҳаи тиб, ки ҳамасола 18 август, дар рӯзи мавлуди нобиғаи ҷаҳонӣ, файласуф ва табиби машриқзамин – Абӯалӣ ибни Сино таҷлил мегардад, табрик мегӯям. Орзуманд ҳастам, ки фаъолияти пуршарафи Шумо дар роҳи ҳифзи саломатӣ ва таъмини зиндагии солим барои ҷомеа ҳамеша бо муваффақият, зафармандӣ ва саодат ҳамроҳ бошад.

Дар даврони соҳибистиқлолӣ, бо сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи тандурустӣ ҳамчун яке аз самтҳои афзалиятнок мавриди таваҷҷуҳи доимӣ қарор гирифта, иқдомҳои муассир ҷиҳати беҳдошти хизматрасонии тиббӣ, пешгирии бемориҳо, ҷиҳозонидани муассисаҳо бо таҷҳизоти муосир ва тайёр намудани мутахассисони варзида роҳандозӣ гардидаанд.

Ҳукумати Ҷумҳурии Тоҷикистон таҳти шиори «Солимии миллат – бойгарии давлат» пайваста кӯшиш ба харҷ медиҳад, то сатҳу сифати хизматрасонии тиббӣ боло рафта, сокинони кишвар аз шароити беҳтари муолиҷаву табобат бархӯрдор бошанд. Дар ҳамин замина, солҳои охир дар ноҳияи Айнӣ низ даҳҳо иншооти тиббӣ бунёд ва азнавсозӣ гардида, садҳо мутахассисони ҷавон ба фаъолият ҷалб шудаанд.

Муҳтарам табибон!

Шумо, ки ворисони арзандаи фарзандони маъруфи тоҷик – Закариёи Розӣ, Абӯалӣ ибни Сино ва даҳҳо бузургони дигар ҳастед, рисолати муқаддас ва пурмасъулиятро ба дӯш доред. Тавре Пешвои муаззами миллат борҳо таъкид намудаанд:

«Табибон охирин даргоҳи умеди беморонанд. Онҳо бо донишу таҷриба, сухани нарму дили пурмеҳр метавонанд дарди беморонро сабук гардонанд».

Бо такя ба таҷрибаи устодони варзида ва талоши пайвастаи худ, боварӣ дорам, ки табибони ноҳия минбаъд низ бо ҳисси баланди масъулият хизмат намуда, сатҳи хизматрасонии тиббиро боз ҳам баланд бардошта, обрӯю эътибори соҳаи тандурустиро қавитар хоҳанд кард.

Бо чунин ниятҳои нек ба Шумо, табибону ҳамшираҳо ва ҳамаи кормандони соҳаи тандурустӣ бахшида ба иди касбӣ саломатӣ, рӯзгори осуда, муваффақиятҳои навин ва сарбаландии рӯзгорро таманно менамоям.

Иди касбӣ муборак, табибони арҷманд!

Ҳамеша сиҳатманду саодатманд бошед!