Дар маҷлисгоҳи Муассисаи таҳсилоти миёнаи умумии №1-и маркази ноҳияи Айнӣ ҳамоиши ҷамъиятӣ баргузор шуд, ки дар он роҳбарияти ноҳия, намояндагони мақомоти ҳифзи ҳуқуқ, сохторҳои давлатӣ, аҳли маориф, рӯҳониён ва фаъолони ҷомеа ширкат варзиданд.
Ҳамоиш бо сухани ифтитоҳии муовини раиси ноҳия Зебо Саидзода оғоз гардид. Ӯ паёму саломи Раиси ноҳияи Айнӣ муҳтарам Равшан Раҳимзодаро ба иштирокчиён расонид.
Сардори ШВКД ҶТ дар ноҳия Алиҷон Рауфзода зимни суханронӣ масъалаҳои мубрами ҷомеаро мавриди баррасӣ қарор дода, ба зарурати пешгирии бегонапарастӣ, риояи қонуни «Дар бораи танзими анъана ва ҷашну маросимҳо», баланд бардоштани маърифати ҳуқуқии шаҳрвандон ва ҷалби ҷавонон ба таҳсилоти олӣ ишора кард.
Мудири шуъбаи маориф Абдусалом Раҷабзода, сархатиби ноҳия Парвизҷон Ҳоҷизода ва дигар масъулон низ баромад намуда, аҳамияти ҳамкории зичи ҷомеа бо мақомоти ҳифзи ҳуқуқро дар пешгирии ҷинояткорӣ ва таъмини риояи қонунҳои амалкунанда таъкид карданд. Ҳамчунин, зарурати истифодаи самараноки қувваи барқ ва саҳмгузорӣ дар ҷамъоварии ҳосили тирамоҳӣ мавриди таваҷҷуҳ қарор гирифт.
Сархатиби ноҳия Парвизҷон Ҳоҷизода дар изҳороташ бар аҳамияти ваҳдату худшиносӣ тавассути таълимоти динӣ таъкид намуда, эҳтиром ба арзишҳои миллӣ ва дурӣ аз тақлиди фарҳангҳои бегонагонро вазифаи рӯҳониён хонд.
Муовини раиси ноҳия Фарҳод Мукаррамзода дар баромади худ зарурати таҳкими омӯзиши фанҳои дақиқ, забонҳои хориҷӣ ва касбу ҳунарро барои ҷалби мутахассисони маҳаллӣ ба корхонаҳои саноатии ноҳия зикр намуд. Ба гуфтаи ӯ, чунин иқдомҳо ба коҳиши муҳоҷирати меҳнатӣ ва рушди иқтисодию иҷтимоии кишвар мусоидат мекунанд.
Дар анҷом, Фарҳод Мукаррамзода дастуру супоришҳои Раиси ноҳияро, ки дар асоси ҳидоятҳои Пешвои миллат муҳтарам Эмомалӣ Раҳмон таҳия шудаанд, ба иштирокчиён ироа намуда, таъкид дошт, ки мақомоти иҷроияи ҳокимияти давлатии ноҳия минбаъд низ барои татбиқи сиёсати давлат ва Ҳукумат талоши бештар хоҳанд кард.
Маркази матбуоти Раиси ноҳияи Айнӣ
и ещё 16
Статистика и объявления
Продвигать публикацию
Все реакции:
19
