Суҳбати озоди гурӯҳи таблиғотии МИҲД-и ноҳияи Айнӣ бо сокинони Ҷамоати деҳоти Урметан

Муовини раиси ноҳия Фарҳод Мукаррамзода ҳамоишро ифтитоҳ намуда, мақсади баргузории чунин мулоқотҳоро шарҳ дод.

Нахуст, сардори Шуъбаи вазорати корҳои дохилии Ҷумҳурии Тоҷикистон дар ноҳия Алиҷон Рауфзода суханронӣ намуда, вобаста ба пешгирии ҷинояткорӣ, бахусус миёни ҷавонон, риояи ҳатмии Қонуни Ҷумҳурии Тоҷикистон «Дар бораи танзими анъана ва ҷашну маросим», пардохти андозу маблағи истифодаи қувваи барқ, тарбияи ҷавонон дар руҳияи ватандӯстиву меҳанпарастӣ ва раҳнамун кардани онҳо ба роҳи рост андеша баён кард.

Ӯ таъкид намуд, ки мақсади мақомоти милитсия ҷазо додан нест, балки дар якҷоягӣ бо ҷомеа пешгирии ҷиноят ва ҷинояткорӣ мебошад. Алиҷон Рауфзода аҳли ҷамоатро ба ваҳдат, якдигарфаҳмӣ ва риояи қонунҳои амалкунанда даъват карда, изҳори нигаронӣ намуд, ки ҳолатҳои қонунвайронкунӣ дар ҳудуди ҷамоат то андозае афзудааст.

Сардори ШВКД инчунин аз аҳли ҷомеа даъват ба амал овард, ки ҷавононро аз шомилшавӣ ба ҳизбу ҳаракатҳои ифротӣ ҷилавгирӣ намуда, онҳоро ба омӯзиш ва таҳсили илмҳои муосир ҷалб намоянд. Ҳамзамон, бо ишора ба ифтитоҳи Донишгоҳи исломии Тоҷикистон зикр кард, ки дар ҳудуди ноҳия набояд таълимоти ғайрирасмии динӣ вуҷуд дошта бошад.

Сипас, мудири Бахши кор бо занон ва оилаи МИҲД-и ноҳия Сайёрахон Халифаева дар мавзӯи пешгирии ҷудошавии оилаҳои ҷавон баромад карда, нақши модаронро дар тарбияи дурусти духтарон ва омода сохтани онҳо ба зиндагии мустақилона муҳим арзёбӣ намуд. Вай таъкид кард, ки духтарон бояд ҳатман ба таҳсилоти олӣ фаро гирифта шаванд, зеро саводнокӣ ва дониши муосир омили асосии пойдории оила мебошад. Ҳамчунин, Сайёрахон Халифаева ба пешгирии тарғиби фарҳанги бегона, риояи Қонуни танзими анъана ва ҷашну маросим ва ҳифзи фарҳанги миллӣ ишора кард.

Мудири Бахши Агентии меҳнат ва шуғли аҳолӣ дар ноҳия Шероз Хокирозода оид ба омӯзондани занону духтарон ба касбу ҳунар, ҷалби онҳо ба шуғли доимӣ ва истифодаи имкониятҳои марказҳои таълимии ноҳия суханронӣ намуд. Вай таъкид кард, ки дар шароити муосир омӯхтани забонҳои хориҷӣ, аз ҷумла забони чинӣ, барои азхуд кардани технологияҳои нав зарур мебошад.

Дар идома, муовини раиси ноҳия Фарҳод Мукаррамзода дастуру супоришҳои раиси ноҳия Равшан Раҳимзодаро ба масъулон расонида, таъкид намуд, ки ҳидоятҳои Пешвои муаззами миллат муҳтарам Эмомалӣ Раҳмон дар мавриди риояи қонунҳои амалкунанда танҳо ба фоидаи мардум равона шудаанд. Ӯ изҳор дошт, ки мақомоти иҷроия корҳои таблиғотиро ҷоннок намуда, дар пешгирии қонуншиканӣ ва сохтмони ғайриқонунӣ чораҳои қатъӣ меандешад.

Мавзӯи истифодаи самараноку оқилонаи замин, захираи доимӣ доштани аҳолӣ, инчунин мутобиқ сохтани ҳамаи лоиҳаҳои сохтмон бо талаботи меъморӣ ва шаҳрсозӣ аз дигар нуктаҳои муҳими баромади муовини раиси ноҳия буд.

Дар рафти вохӯрӣ омӯзгори МТМУ №40 Мирзоёров Санъатмурод ва аъзои ҷамоат Ғуфрон Султонов низ ба сухан баромада, дастгирии худ ва аҳли деҳаро аз сиёсати хирадмандонаи Пешвои миллат муҳтарам Эмомалӣ Раҳмон баён доштанд. Онҳо инчунин масъалаи бо оби полезӣ таъмин намудани Дашти Устообод, танзими нарху наво дар бозору мағозаҳо ва ҳаракати нақлиёт дар дохили деҳаҳоро ба миён гузоштанд.

Дар қисмати суолу ҷавоб сокинони Ҷамоати деҳоти Урметан саволҳои худро пешниҳод намуда, ҷавобҳои қаноатбахш гирифтанд.