Дар партави сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, субҳи рӯзи 23 августи соли 2025 дар деҳаи Фатмовути Ҷамоати деҳоти Рарзи ноҳияи Айнӣ маросими гузоштани хишти аввал дар бинои нави Муассисаи таҳсилоти умумии №62 бо иштироки Раиси ноҳияи Айнӣ Равшан Раҳимзода баргузор гардид.

Бо талошу ғамхориҳои роҳбарияти давлат ва Ҳукумати кишвар дар айни замон дар ноҳияи Айнӣ сохтмони 4 мактаби таҳсилоти миёнаи умумӣ ва 3 муассисаи томактабӣ ба роҳ монда шудааст, ки шаҳодати равшани таваҷҷуҳи хосса ба рушди соҳаи маориф мебошад.

Дар деҳаи Фатмовут аз солҳои 40-уми асри гузашта як синфхона ҳамчун филиали мактаби таҳсилоти умумии №7 деҳаи Похут фаъолият мекард. Дар он чор синф (аз 1 то 4) якҷоя таҳсил менамуданд ва шумораи хонандагон то 30 нафар мерасид. Пас аз хатми синфи чорум хонандагон маҷбур буданд масофаи 7–8 км роҳро тай намуда, таҳсилашонро дар мактаби деҳаи Похут идома диҳанд. Ин ҳолат, махсусан дар фасли зимистон ва дар шароити гузаштан аз рӯди пуроб, мушкилоти зиёд эҷод мекард.

Бо дарназардошти дархости сокинон, соли 1989 клуби деҳа, ки дар тобеияти колхози ба номи Энгелс буд, ба таври ҳашар ба синфхонаҳо табдил дода шуд ва мактаби таҳсилоти умумии асосии №62 ифтитоҳ гардид. Дар он солҳо зиёда аз 50 хонанда таҳсил мекард ва омӯзгорон аз деҳаҳои ҳамсоя ҷалб мешуданд. Бо гузашти вақт муассиса бо кадрҳои маҳаллӣ таъмин гардид, ки шумораи онҳо то 20 нафар расид ва беш аз сеяки онҳоро омӯзгорзанон ташкил медиҳанд.

Айни ҳол муассиса таҳти №62 фаъолият дошта, тибқи дурнамо шумораи хонандагон солҳои оянда зиёда аз 100 нафар хоҳад шуд. Хонандагони он борҳо дар озмунҳои ҷумҳуриявӣ ва олимпиадаҳои фаннӣ ширкат намуда, то ба даври вилоятӣ роҳ ёфта, ҷойҳои ифтихориро соҳиб шудаанд.

Муассисаи нав дар ду ошёна бунёд гардида, дорои 8 синфхона буда, барои таҳсили 192 хонанда дар як баст пешбинӣ шудааст ва дар сурати афзоиши аҳолӣ имкони фарогирии то 320 хонандаро дар ду баст низ хоҳад дошт. Илова бар синфхонаҳо, мактаб бо биноҳои ёрирасон, ҳоҷатхона, анбори сӯзишворӣ, системаи гармидиҳӣ, нуқтаи обтаъминкунӣ, ҳавзи зиддисӯхтор, ҳавзи обпарто ва майдончаи кушод барои баргузории чорабиниҳо муҷаҳҳаз мегардад. Масоҳати умумии замин зиёда аз 2 сотихро ташкил медиҳад.

Фармоишгари лоиҳа Бунёди миллии иҷтимоии маблағгузории Тоҷикистон буда, корҳои сохтмониро Ҷамъияти саҳомии кушодаи “Калонаи сайёри механиконидашуда” ба уҳда гирифтааст.

Зимни суханронӣ Раиси ноҳия Равшан Раҳимзода иброз намуд, ки сиёсати маорифпарваронаи Пешвои миллат заминаи мусоид барои таълиму тарбияи насли ояндасоз фароҳам меорад ва ҳар як сокини кишвар бояд дар ободонӣ ва пешрафти диёр саҳмгузор бошад.

Сокинони деҳаи Фатмовут ва фаъолони ҷамоат низ дар суханрониҳои худ аз ғамхориҳои ҳамешагии Пешвои миллат ва Ҳукумати ҷумҳурӣ изҳори сипос карда, таъкид намуданд, ки сиёсати созанда ва башардӯстонаи давлатро ҳамеша пуштибонӣ хоҳанд кард.