Бо мақсади беҳтар намудани вазъи обёрии заминҳо дар ноҳияи Айнӣ мақомоти иҷроияи ҳокимияти давлатии ноҳия ҳамасола ҷаҳду талош намуда, барои самаранок истифода кардани ҳар як ваҷаб замин ва ба ин васила саҳми назаррас гузоштан дар таъмини амнияти озуқавории кишвар кӯшишҳо ба харҷ медиҳад.
Ба хотири иҷро намудани мақсадҳои болозикр бо дастгирии мақомоти иҷроияи ҳокимияти давлатии ноҳия чор пойгоҳи обӣ дар ноҳия таъмиру таҷдид гардида, инчунин тавассути қубурҳо хатҳои оби полезӣ ва нӯшокӣ бунёд мегарданд, ки ин боиси дар ҳудуди ҷамоатҳои шаҳраку деҳоти ноҳия зиёд гардидани боғу заминҳои нав мешавад.
Асосан, мавсими киштукори баҳорӣ дар ноҳияи Айнӣ аз моҳи апрел оғоз мегардад ва имрӯз мардум заминҳои корамро шудгор карда, барои кишт омода намуда истодаанд. Аз идораи оби ноҳия иттилоъ доданд, ки пойгоҳҳои обкашӣ пурра омода буда, дар рӯзҳои наздик ба фаъолият шуруъ мекунанд.
Дар Дашти Хушекат зиёда аз 200 гектар замин маҳз тавассути пойгоҳҳои обкашӣ ва мангул(дюкер) обёрӣ мешаванд. Хоҷагии деҳқонии Хушекат мувофиқи нақша бояд дар масоҳати 8 гектар кишти картошкаро ба роҳ монад. Айни ҳол заминҳои бедакиштшударо мардум шудгор карда, барои кишти картошка омода менамоянд. Шинонидани картошка низ дар ин хоҷагӣ оғоз шудааст.
и ещё 14
