4-уми июни соли 2025 дар ноҳия вохӯрии Раиси ноҳияи Айнӣ бо соҳибкорон ва намояндагони корхонаҳои саноатии дар ноҳия фаъолияткунанда баргузор гардид.
Раиси ноҳияи Айнӣ Рӯзибой Раҳимзода ҳадафи асосии мулоқотро гузаронидани суҳбати озод, муколамаю ҳамкориҳои судманд байни Мақомоти иҷроияи ҳокимияти давлатии ноҳияи Айнӣ ва соҳибкорон, зодагони ноҳия, ки дар сатҳи ҷумҳурӣ фаъолият мекунанд арзёбӣ намуд.
Раиси ноҳияи Айнӣ Рӯзибой Раҳимзода зимни суханрониаш зикр намуд, ки дар партави сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар соли 2025 бо азму талоши сокинони ноҳия иқдому ташаббусҳои созанда вусъати бесобиқа касб карда, мардуми сарбаланди мо ба хотири боз ҳам ободу зебо гардонидани ватани биҳиштосои худ сарҷамъу аҳлона ва беш аз ҳар вақти дигар заҳмат кашида, ба дастовардҳои бузург ноил гардида истодаанд.
Зикр гардид, ки ҷиҳати тақвият бахшидан ба раванди амалигардонии ҳадафи чоруми миллӣ -“Саноатикунонии босуръати мамлакат” ва бинобар аҳаммияти бузурги соҳаи саноат дар рушди минбаъдаи мамлакат, ҳалли масъалаҳои иҷтимоиву иқтисодӣ ва таъмин намудани иҷрои ҳадафҳои стратегии миллӣ Фармони Президенти Ҷумҳурии Тоҷикистон муҳтарам Эмомалӣ Раҳмон дар бораи «Солҳои рушди саноат» эълон намудани солҳои 2022-2026 ба тасвиб расидааст.
Ҳамчунин, дар доираи сиёсати пешгирифтаи давлату Ҳукумат доир ба дастгирии фаъолияти соҳибкориву сармоягузорӣ дар замони соҳибистиқлолӣ тадбирҳои зарурӣ амалӣ гардида, дар ин самт барои соҳибкорон имтиёзу сабукиҳои зиёд ҷорӣ карда шуданд.
Рӯзибой Раҳимзода гуфт, ки ҳадафи асосии вохӯрии имрӯзаи мо беҳтар намудани фазои сармоягузорӣ, ҷалби сармояи мустақим, дастгирии соҳибкории хурду миёна, баланд бардоштани иқтидори иқтисодӣ ва содиротии ноҳия, бунёди корхонаву коргоҳҳои нави истеҳсолии бозгӯ ба талаботи ҷаҳони муосир, истеҳсоли молу маҳсулоти рақобатпазир, воридотивазкунанда ва муаррификунандаи давлату миллат, таъсиси ҷойҳои нави корӣ ва дар сатҳи баланди ватандорӣ истиқбол гирифтани Ҷашни 35 – солагии Истиқлоли давлатии Ҷумҳурии Тоҷикистон мебошад.
Беҳуда нест, ки мегӯянд соҳибкорон муҳаррики асосии кишвар ба ҳисоб мераванд. Бинобар ин Мақомоти иҷроияи ҳокимияти давлатии ноҳияи Айнӣ барои заминаи мусоид фароҳам овардан ба соҳибкорон кӯшиш менамояд ва дар ин самт аз ҳамаи имкониятҳои мавҷуда истифода мебарад. Дар ноҳия барои рушди соҳибкорӣ заминаҳои мусоид фароҳам оварда шудааст. Дар ноҳияамон минтақаи саноатӣ мавҷуд аст. Боиси қайд аст, ки соҳаи саноат дар рушди минбаъдаи мамлакат, ҳалли масъалаҳои иҷтимоиву иқтисодӣ ва таъмин намудани иҷрои ҳадафҳои стратегии миллӣ аҳамияти бузург дорад. Захираҳои бузурги ашёи хоми ватанӣ имкон медиҳанд, ки тавассути коркарди пурраи маъдан, аз ҷумла металлҳои рангаву қиматбаҳо саноати сӯзишворӣ рушд намуда, саноатикунонии босуръати мамлакат таъмин карда шавад.
Ҳамзамон мо барои рушди соҳаи сайёҳӣ имконоти хеле хуб дорем ва МИҲД-и ноҳия дар навбати худ баҳри тараққӣ кардани соҳа пайваста чораҳои зарурӣ андешида, саҳми муносиб мегузорад. Айни ҳол дар ноҳия 2 адад ширкати сайёҳӣ ва Ассотсиатсияи рушди сайёҳии Зарафшон фаъолият мебарад. Дар ноҳия 107 адад субъектҳои хизматрасонии сайёҳӣ, аз ҷумла 5 адад мавзеъҳои таърихӣ, 2 адад базаи сайёҳӣ ва 12 адад меҳмонхона бо ғунҷоиши 499 ҷой, 4 адад хонаи истироҳатӣ, 1 адад осоишгоҳ, 2 адад осорхона, 18 адад мавзеи ёдгориҳои таърихию фарҳангӣ, 14 адад зиёратгоҳҳои шахсони фарҳангию таърихии миллати тоҷик, 1 адад ҳавзи моҳипарварӣ, 26 адад мағозаҳои хӯрокворӣ ва озуқаворӣ ва зиёда аз 28 адад нуқтаҳои хӯроки умумӣ фаъолияти пурсамар доранд.
Боварӣ дорам дар ноҳия бунёди инфрасохтори иловагии соҳаи сайёҳӣ, ҷалби сайёҳонро афзун мегардонад ва ба ин васила ба даст овардани даромад ҳам ба буҷети давлат ва ҳам ба буҷаи хусусӣ заминаи мусоид фароҳам меоварад.
Мақомоти иҷроияи ҳокимияти давлатии ноҳия ҷиҳати таҷлили сазовори Ҷашни 35-солагии Истиқлоли давлатии Ҷумҳурии Тоҷикистон нақшаи иншооти ҷашниро ба тасвиб расонида, дар ин самт корбарӣ намуда истодааст. Лозим аст, ки дар ин самт соҳибкорон низ барои густариши фаъолияти соҳибкории худ бо мақомоти иҷроияи ҳокимияти давлатии ноҳия муроҷиат намоянд ва дар навбати худ мо омода ҳастем, ки ҷиҳати фароҳам овардани шароити мусоид тадбирҳои заруриро амалӣ намоем.
Соҳибкорон ва намояндагони корхонаҳои хурду бузурги саноатии ноҳия дар мулоқот ҳадаф гузоштанд, ки барои сохтмони корхонаҳои истеҳсолӣ, иншооти иҷтимоӣ, махсусан мактабҳо ва боғчаҳои кӯдаконаи хусусӣ саҳмгузорӣ менамоянд. Ҳамчунин, соҳибкорон С. Давлатов, Х. Холиқов, Х. Хуҷов, З. Исрофилов ва С. Лутфова ва намояндагони корхонаҳои саноатии ноҳия барои рушду нумуи хоҷагии халқи ноҳия нақшаҳои худро пешниҳод намуданд.
Рӯзибой Раҳимзода иброз дошт, ки Мақомоти иҷроияи ҳокимияти давлатии ноҳия омодааст дар ҳама самтҳо бо соҳибкорон ҳамкории судмандро ба роҳ монад.
и ещё 17
