Бо мақсади иҷрои Амри Президенти Ҷумҳурии Тоҷикистон аз 2 январи соли 2025, №АП-713, дар Қасри фарҳанги ба номи Нақибхон Туғрали ноҳияи Айнӣ даври аввали фестивал-озмуни ҷумҳуриявии телевизионии эҷодиёти халқ «Андалеб – 2025» баргузор гардид. Дар чорабинӣ муовини Раиси ноҳия Зебо Саидзода иштирок ва суханронӣ намуд.
Фестивал бо ҳадафи муаррифии дастовардҳои ҳунариву фарҳангии даврони соҳибистиқлолӣ, эҳёи анъанаҳои мардумӣ, ҷалби ҷавонон ба фарҳанг ва ҳунар, дарёфти чеҳраҳои нави эҷодкор ва баланд бардоштани нақши ансамблу гурӯҳҳои ҳунарӣ дар тарбияи насли наврас роҳандозӣ шуд.
Дар чорабинӣ дастпарварони муассисаҳои фарҳангӣ аз рӯи 12 бахши озмун баромадҳои ҳунарии худро, аз ҷумла дар жанрҳои сарояндагӣ, рақси миллӣ, сурудҳои ансамблӣ, намоишҳои театрӣ, ҳунарҳои мардумӣ ва дигар бахшҳои эҷодиёти халқӣ манзури тамошобинон ва ҳайати ҳакамон гардониданд.
Ҳайати ҳакамон, ки аз шахсони варзида ва соҳиби таҷрибаи ғанӣ иборат буданд, баромадҳои иштирокчиёнро аз рӯи меъёрҳои сатҳи касбият, мазмун, саҳнаороӣ, мутобиқати либосҳои саҳнавӣ ва дараҷаи навоварӣ баҳогузорӣ намуданд. Ба ҳайати ҳакамон директори Маркази илмӣ-методии Раёсати фарҳанги вилояти Суғд Олимҷон Юсупов, сармутахассиси раёсат Шодиева Обода ва директори Театри давлатии мазҳакаи мусиқии ба номи Камоли Хуҷандӣ Эҳсон Ҳомидов шомил буданд.
Дар натиҷаи ҷамъбасти баҳогузорӣ ғолибони даври ноҳиявӣ муайян гардида, ҷойҳои ифтихорӣ ба иштирокчиёни зерин супорида шуд:
Ҷойи I – Озода Раҳматҷонова (рақси якка),
Ҷойи II – Баҳодур Ғафуров (суруди якка),
Ҷойи III – Рамазон Исломзода (шашмақомсаройӣ).
Ғолибон бо диплом ва ифтихорномаҳои Бахши фарҳанги мақомоти иҷроияи ҳокимияти давлатии ноҳияи Айнӣ сарфароз гардида, ба даври вилоятӣ роҳхат гирифтанд. Илова бар ин, як қатор иштирокчиён барои иштироки фаъолона бо ифтихорнома қадрдонӣ шуданд.
Дар интиҳои чорабинӣ бо суханони ҷамъбастӣ директори Маркази илмӣ-методии Раёсати фарҳанги вилояти Суғд Олимҷон Юсупов ва Муовини раиси ноҳияи Айнӣ Зебо Саидзода баромад намуда, ба аъзои ҳайати ҳакамон, ҳунармандон ва роҳбарони муассисаҳои фарҳангӣ барои баргузории як чорабинии сатҳи баланд изҳори сипос карданд.
Фестивал-озмуни «Андалеб – 2025» дар фазои идона ва бо руҳияи баланди ватандӯстӣ баргузор гардида, барои рушди фарҳанг ва арҷгузорӣ ба арзишҳои миллӣ саҳми арзанда гузошт.
и ещё 21
Статистика и объявления
Продвигать публикацию
Все реакции:
58
