Паёми табрикии раиси ноҳияи Айнӣ Равшан Раҳимзода бахшида ба Рӯзи таъсисёбии Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон

Муҳтарам кормандони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, наҷотдиҳандагони далеру шуҷоъ!

Бо камоли эҳтиром ва самимияти самимӣ Шумо ва дар симои Шумо тамоми кормандони соҳаи ҳолатҳои фавқулодда ва мудофиаи гражданиро ба муносибати 32-солагии таъсисёбии Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон табрику муборакбод менамоям.

Дар тӯли 32 соли фаъолияти худ Кумита ҳамчун яке аз сохторҳои муҳими таъмини амнияти миллӣ ва ҳифзи ҳаёту саломатии аҳолӣ мавқеи арзандаи худро пайдо намуда, дар пешгирӣ ва рафъи оқибатҳои офатҳои табиӣ ва техногенӣ, ҷустуҷӯ ва наҷоти шаҳрвандон, расонидани ёрии саривақтӣ ва ҳифзи аҳолӣ аз хатарҳои эҳтимолӣ саҳми назаррас гузоштааст.

Касби наҷотдиҳанда аз ҷумлаи касбҳои пурмасъулият ва пуршараф ба шумор меравад. Зеро наҷотдиҳанда дар лаҳзаҳое ба ёрии инсонҳо мешитобад, ки ҳаёт ва саломатии онҳо дар хатар аст. Ҷасорат, матонат, омодагии касбӣ ва фидокории кормандони ин соҳа дар лаҳзаҳои душвор барои ҷомеа такягоҳи боэътимод мебошад.

Боиси қаноатмандист, ки дар ҳудуди минтақаи Зарафшон низ фаъолияти сохторҳои наҷотдиҳӣ сол то сол таҳким ёфта истодааст. Дастаи махсуси зудамали наҷотдиҳии вилояти Суғд дар водии Зарафшон ҳашт сол боз фаъолияти пурсамар дошта, дар ин муддат дар пешгирӣ ва рафъи оқибатҳои ҳолатҳои фавқулодда, анҷом додани корҳои наҷотдиҳӣ ва таъмини амнияти сокинони минтақа саҳми назаррас гузоштааст.

Кормандони даста дар шароити гуногуни табиӣ ва иқлимӣ, ҳангоми заминларза, сел, ярч, тарма, обхезӣ ва дигар ҳолатҳои хатарнок омодагии баланди касбӣ нишон дода, бо ҳисси масъулияти баланд ба аҳолӣ хизмат менамоянд. Фаъолияти онҳо барои сокинони ноҳияи Айнӣ ва дигар шаҳру ноҳияҳои водии Зарафшон аҳамияти хос дорад.

Имрӯз мо бо ифтихор метавонем таъкид намоем, ки дар паси ҳар як амалиёти наҷотдиҳӣ, ҳар як соати навбатдорӣ ва ҳар як сафари хизматӣ меҳнати инсонҳои ҷасур ва фидокоре қарор дорад, ки рисолати муқаддаси худро — ҳифзи ҷони инсон ва хизмат ба Ватан — бо садоқат иҷро менамоянд.

Дар ин рӯзи фархунда ба тамоми кормандони Кумита ва воҳидҳои наҷотдиҳӣ, бахусус наҷотдиҳандагони Дастаи махсуси зудамали наҷотдиҳии вилояти Суғд дар водии Зарафшон, барои хизмати содиқона, меҳнати шабонарӯзӣ ва фаъолияти пурмасъулияташон арзи сипос менамоям.

Итминон дорам, ки Шумо минбаъд низ бо истифода аз таҷрибаи ғанӣ, донишу малакаи касбӣ ва рӯҳияи баланди ватандӯстӣ рисолати худро сарбаландона идома дода, барои ҳифзи ҳаёту саломатии мардум ва таъмини амнияти ҷомеа саҳми арзандаи худро мегузоред.

Ба ҳар яки Шумо тансиҳатӣ, умри дароз, матонату неруи қавӣ, саодати рӯзгор, осоиши аҳли оила ва дар фаъолияти пуршарафи хизматӣ комёбиҳои нав ба нав орзу менамоям.

Рӯзи таъсисёбии Кумитаи ҳолатҳои фавқулодда ва мудофиаи гражданӣ муборак бошад!

Поянда бод хизмати фидокоронаи наҷотдиҳандагони Тоҷикистон!