Дар толори калони мақомоти иҷроияи ҳокимияти давлатии ноҳияи Айнӣ маҷлиси ҷамъбасти натиҷаҳои рушди иҷтимоию иқтисодии ноҳия дар нуҳ моҳи соли 2026 баргузор гардид.
Дар маҷлис раиси ноҳияи Айнӣ Равшан Раҳимзода, намояндаи Ҳукумати Ҷумҳурии Тоҷикистон, муовини якуми сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон Ардашер Мирзозода, намояндаи мақомоти иҷроияи ҳокимияти давлатии вилояти Суғд, намояндаи соҳаи беҳдошти замин ва обёрии вилояти Суғд Аъзамҷон Ҷӯраев, роҳбарони мақомоти ҳифзи ҳуқуқ, раисони ҷамоатҳои шаҳраку деҳот, роҳбарони ташкилоту муассисаҳо, раиси Кумитаи иҷроияи Ҳизби Халқии Демократии Тоҷикистон дар ноҳия, раисони хоҷагиҳои деҳқонӣ, директорони муассисаҳои таълимӣ ва дигар шахсони масъул иштирок намуданд.
Дар оғози маҷлис муовини раиси ноҳияи Айнӣ Фарҳод Мукаррамзода оид ба натиҷаҳои фаъолияти соҳаҳои гуногуни хоҷагии халқи ноҳия дар нуҳ моҳи соли ҷорӣ ҳисоботи муфассал пешниҳод намуд. Дар ҳисобот вазъи иҷрои нақшаҳои пешбинишуда, нишондиҳандаҳои рушди иқтисодию иҷтимоӣ, фаъолияти соҳаҳои саноату кишоварзӣ, корҳои сохтмонӣ, вазъи муассисаҳои иҷтимоӣ ва масъалаҳои ҳалталаби ноҳия мавриди таҳлилу баррасӣ қарор гирифтанд.
Зимни муҳокима таъкид гардид, ки дар баробари дастовардҳои мавҷуда, дар баъзе самтҳо ҳанӯз мушкилоту камбудиҳо ҷой дошта, барои бартараф намудани онҳо ва таъмини рушди устувори ноҳия андешидани тадбирҳои мушаххас зарур мебошад.
Дар ҷараёни маҷлис ба масъалаи рушди соҳаи саноат, афзоиши ҳаҷми истеҳсоли маҳсулоти ватанӣ ва истифодаи самараноки имкониятҳои мавҷуда таваҷҷуҳи махсус зоҳир карда шуд. Таъкид гардид, ки масъулони соҳа бояд барои таъсиси коргоҳҳои хурду бузурги саноатӣ, ҷалби сармоя, дастгирии соҳибкорон, коркарди ашёи хоми маҳаллӣ ва фароҳам овардани ҷойҳои нави корӣ тадбирҳои амалӣ андешанд.
Ҳамзамон, зарурати рушди ҳунарҳои мардумӣ, эҳёи анъанаҳои миллӣ ва ба роҳ мондани истеҳсоли маҳсулоти рақобатпазир таъкид шуд. Зикр гардид, ки рушди истеҳсолот ва соҳибкорӣ бояд ба натиҷаҳои воқеӣ, афзоиши даромади аҳолӣ ва беҳтар гардидани вазъи иқтисодии ноҳия мусоидат намояд.
Дар идомаи маҷлис натиҷаҳои фаъолияти соҳаи кишоварзӣ, истифодаи мақсадноки замин, ҳолати заминҳои кишоварзӣ ва таъмини саривақтии хоҷагиҳо бо оби полезӣ мавриди баррасӣ қарор гирифтанд. Ба масъалаҳои баланд бардоштани ҳосилнокии зироатҳо, риояи қоидаҳои агротехникӣ, истифодаи самараноки заминҳои корам, пешгирии истифодаи ғайримақсадноки қитъаҳои замин ва беҳтар намудани ҳолати мелиоративии онҳо таваҷҷуҳи махсус зоҳир гардид.
Дар маҷлис масъалаҳои таъмини аҳолӣ ва корхонаҳо бо неруи барқ, истифодаи сарфакоронаи он ва баланд бардоштани масъулияти истифодабарандагон низ мавриди таҳлил қарор гирифтанд. Таъкид шуд, ки масъулони соҳаи энергетика бояд барои беҳтар намудани хизматрасонӣ, пешгирии талафоти неруи барқ ва баланд бардоштани маърифати аҳолӣ дар самти истифодаи оқилонаи захираҳои энергетикӣ тадбирҳои зарурӣ андешанд.
Ҳамзамон, вазъи иҷрои нақшаи ҷамъоварии андозҳо, афзоиши даромадҳои буҷетӣ ва тақвияти корҳои фаҳмондадиҳӣ миёни андозсупорандагон баррасӣ гардид. Зарурати сари вақт пардохт намудани андозҳо, пешгирии бақияпулиҳо ва таъмини иҷрои уҳдадориҳои молиявӣ таъкид карда шуд.
Дар идомаи маҷлис рафти корҳои сохтмонӣ, бунёду азнавсозии иншооти иҷтимоию иқтисодӣ, таъмиру нигоҳдории роҳҳо ва ободонии шаҳраку деҳоти ноҳия мавриди баррасӣ қарор гирифт. Таъкид гардид, ки корҳои созандагӣ бояд бо риояи талаботи меъёрҳои сохтмонӣ, сифати баланд ва истифодаи самараноки маблағҳо амалӣ карда шаванд.
Роҳбарони ҷамоатҳои шаҳраку деҳот ва ташкилоту муассисаҳо вазифадор мебошанд, ки барои беҳтар намудани симои маҳалҳо, тозаву озода нигоҳ доштани кӯчаву роҳҳо, бунёди гулгашту майдончаҳо ва тақвияти корҳои сабзкорӣ саҳми фаъол гузоранд.
Дар бахши иҷтимоӣ фаъолияти муассисаҳои маориф, тандурустӣ ва фарҳанг низ мавриди таҳлилу баррасӣ қарор гирифт. Зарурати баланд бардоштани сифати таълиму тарбия, таҳкими интизом дар муассисаҳои таълимӣ, беҳтар намудани хизматрасонии тиббӣ ва фароҳам овардани шароити мусоид барои фаъолияти муассисаҳои фарҳангӣ таъкид гардид.
Ҳамзамон, ба масъалаҳои тарбияи насли наврасу ҷавон дар рӯҳияи ватандӯстӣ, худшиносии миллӣ, эҳтиром ба арзишҳои фарҳангӣ, тарғиби китобхонӣ ва рушди ҳунарҳои мардумӣ таваҷҷуҳ зоҳир карда шуд.
Дар маҷлис масъалаҳои марбут ба сиёсати давлатии ҷавонон ва баланд бардоштани мақоми занон дар ҷомеа низ баррасӣ гардиданд. Таъкид шуд, ки барои фароҳам овардани шароити мусоид ҷиҳати таҳсилу касбомӯзӣ, шуғли ҷавонон, дастгирии ташаббусҳои созандаи онҳо ва ҷалби бештари ҷавонону занон ба корҳои ҷамъиятӣ ва идоракунии маҳаллӣ тадбирҳои зарурӣ андешида шаванд.
Ҳамзамон, зарурати тақвияти корҳои тарбиявию маърифатӣ, пешгирии ҳуқуқвайронкунӣ дар байни ҷавонон, дастгирии занони соҳибкор ва фароҳам овардани имкониятҳои баробар барои иштироки фаъолонаи занон дар ҳаёти иҷтимоию иқтисодии ноҳия таъкид гардид.
Яке аз масъалаҳои муҳими маҷлис вазъи ҳифзи иҷтимоии аҳолӣ, дастгирии оилаҳои осебпазир ва таъмини саривақтии кумакҳои унвонии иҷтимоӣ ба шаҳрвандони ниёзманд буд. Таъкид гардид, ки масъулони соҳа бояд ҷиҳати муайян намудани эҳтиёҷоти воқеии оилаҳои камбизоат, шахсони дорои имкониятҳои маҳдуд ва дигар гурӯҳҳои осебпазири аҳолӣ корҳои заруриро ба роҳ монда, барои расонидани кумакҳои иҷтимоӣ дар доираи талаботи қонунгузорӣ ва тартиби муқарраршуда тадбирҳои муассир андешанд.
Ҳамзамон, зарурати тақвияти ҳамкории сохторҳои дахлдор, баланд бардоштани масъулияти кормандон ва таъмини шаффофияти раванди муайян намудани гирандагони кумакҳои иҷтимоӣ таъкид карда шуд.
Дар ҷараёни маҷлис масъалаҳои вобаста ба қабули шаҳрвандон, баррасии муроҷиатҳои хаттию шифоҳӣ ва ҳалли мушкилоти аҳолӣ низ мавриди таваҷҷуҳ қарор гирифтанд. Зикр шуд, ки ҳар як муроҷиати шаҳрванд бояд мавриди омӯзиши воқеӣ қарор гирифта, барои ҳалли мушкилоти мавҷуда дар доираи ваколатҳои сохторҳои дахлдор чораҳои мушаххас андешида шаванд. Баланд бардоштани сатҳи масъулияти хизматчиёни давлатӣ ва таҳкими робитаи бевосита бо аҳолӣ аз омилҳои муҳими беҳтар намудани сифати хизматрасонии давлатӣ арзёбӣ гардид.
Дар маҷлис масъалаҳои таъмини волоияти қонун, таҳкими интизоми ҷамъиятӣ ва риояи талаботи қонунгузорӣ дар ҳамаи соҳаҳо низ мавриди баррасӣ қарор гирифтанд.
Ба масъалаи риояи талаботи қонунгузорӣ дар самти танзими ҷашну маросим, пешгирии исрофкорӣ ва хароҷоти зиёдатӣ таваҷҷуҳи махсус зоҳир карда шуд.
Таъкид гардид, ки шаҳрвандон бояд ҳангоми баргузории ҷашну маросим талаботи қонунро риоя намуда, аз намоишкорӣ ва хароҷоти беҳуда худдорӣ намоянд. Ба ҷойи хароҷоти зиёдатӣ, таваҷҷуҳи бештар бояд ба таълиму тарбияи фарзандон, беҳтар намудани шароити зиндагии оилаҳо, дастгирии ниёзмандон ва корҳои ободонию созандагӣ равона карда шавад.
Дар баробари масъалаҳои иқтисодию иҷтимоӣ, ҳифзи муҳити зист, таъмини тозагии санитарии маҳалҳо ва истифодаи оқилонаи захираҳои табиӣ низ аз масъалаҳои муҳими маҷлис ба ҳисоб рафтанд. Таъкид гардид, ки барои пешгирии ифлосшавии муҳити зист, тоза нигоҳ доштани соҳили дарёҳо, кӯчаҳо ва ҷойҳои ҷамъиятӣ, беҳтар намудани вазъи санитарии маҳалҳо ва баланд бардоштани маърифати экологии аҳолӣ бояд тадбирҳои мушаххас андешида шаванд.
Масъулони дахлдор вазифадор мебошанд, ки корҳои ободонию сабзкориро тақвият бахшида, аҳолиро ба ташаббусҳои созанда ҷалб намоянд ва барои ҳифзи табиати зебои ноҳия саҳми муносиб гузоранд.
Дар идомаи маҷлис намояндаи Ҳукумати Ҷумҳурии Тоҷикистон Ардашер Мирзозода ва намояндаи мақомоти иҷроияи ҳокимияти давлатии вилояти Суғд Аъзамҷон Ҷӯраев оид ба масъалаҳои муҳими рушди иҷтимоию иқтисодии ноҳия ва вазифаҳои минбаъдаи масъулон андешаронӣ намуданд.
Равшан Раҳимзода раиси ноҳияи Айнӣ зимни баррасии масъалаҳо зарурати таҳлили воқеъбинонаи натиҷаҳои фаъолият, бартараф намудани камбудиҳои ҷойдошта, баланд бардоштани масъулияти роҳбарон ва таъмини иҷрои босифату саривақтии нақшаҳои пешбинишударо таъкид намуд.
Ҳамзамон, таваҷҷуҳи масъулон ба рушди истеҳсолот, истифодаи самараноки захираҳои мавҷуда, беҳтар намудани хизматрасонӣ ба аҳолӣ, риояи қонунгузорӣ ва тақвияти корҳои ободонию созандагӣ ҷалб карда шуд.
Дар маҷмӯъ, маҷлиси ҷамъбастӣ барои муайян намудани вазифаҳои минбаъда, бартараф кардани мушкилоти мавҷуда ва тақвияти фаъолияти созанда дар ҳамаи соҳаҳои хоҷагии халқи ноҳияи Айнӣ замина фароҳам овард.
Дар фарҷоми маҷлис таъкид гардид, ки роҳбарони ташкилоту муассисаҳо, раисони ҷамоатҳои шаҳраку деҳот ва масъулони соҳаҳо бояд ҷиҳати иҷрои босифат ва саривақтии вазифаҳои гузошташуда, рушди устувори иҷтимоию иқтисодии ноҳия, баланд бардоштани сатҳи хизматрасонӣ ва беҳтар намудани шароити зиндагии аҳолӣ тадбирҳои мушаххас андешанд.
Хадамоти матбуоти раиси ноҳияи Айнӣ
Показать меньше
