Дар ноҳияи Айнӣ ба истиқболи ҷашни 35-солагии Истиқлоли давлатии Ҷумҳурии Тоҷикистон корҳои созандагию ободонӣ бо маром идома дошта, ҷиҳати боз ҳам беҳтар намудани инфрасохтори маҳаллӣ ва фароҳам овардани шароити мусоиди зиндагӣ барои аҳолӣ тадбирҳои мушаххас амалӣ мегарданд.
Дар ин раванд ба таъмиру таҷдиди роҳҳо, ободонии маҳалҳо, рушди инфрасохтори иҷтимоӣ ва беҳтар намудани сатҳи хизматрасонӣ ба аҳолӣ таваҷҷуҳи махсус зоҳир карда мешавад.
Яке аз корҳои муҳиме, ки дар доираи омодагӣ ба ҷашни фархундаи миллӣ амалӣ мегардад, мумфаршкунии роҳи байнидеҳавии деҳаи Зоосуни Ҷамоати деҳоти Айнӣ мебошад.
Айни замон дар ин қитъаи роҳ корҳои мумфаршкунӣ идома дошта, сокинони деҳа низ дар раванди ободонӣ саҳми худро мегузоранд. Бо дарназардошти шароити кӯҳистонии минтақа ва аҳамияти роҳ дар ҳаёти ҳаррӯзаи мардум, анҷоми чунин корҳо барои сокинони деҳаи Зоосун иқдоми муҳим ба ҳисоб меравад.
Тибқи нақша, дар ин мавзеъ қариб 2 километр роҳи байнидеҳавӣ мумфарш карда мешавад. Паҳноии роҳ тақрибан 4 метр буда, ғафсии қабати мумфарш вобаста ба қитъа аз 6 то 10 сантиметрро ташкил медиҳад.
Ба истифода додани роҳи наву обод барои беҳтар гардидани ҳаракати воситаҳои нақлиёт, осон шудани рафтуомади сокинон ва тақвияти робитаҳои байни деҳаҳо мусоидат хоҳад кард. Ҳамзамон, беҳтар гардидани ҳолати роҳ ба рушди фаъолияти иқтисодӣ ва иҷтимоии аҳолӣ низ таъсири мусбат мерасонад.
Дар маросими оғози корҳои мумфаршкунӣ раиси ноҳияи Айнӣ Равшан Раҳимзода иштирок намуда, бо сокинон ва фаъолони деҳа суҳбат анҷом дод. Зимни мулоқот таъкид гардид, ки ободии маҳал пеш аз ҳама аз ҳисси масъулиятшиносӣ ва саҳмгузории худи сокинон вобаста буда, ташаббусҳои созанда бояд бо иштироки фаъолонаи ҷомеа идома ёбанд.
Дар баробари мумфаршкунии роҳ, дар деҳаи Зоосун ба беҳтар намудани инфрасохтори иҷтимоӣ ва фароҳам овардани шароити муносиб барои зиндагии аҳолӣ низ таваҷҷуҳ зоҳир карда мешавад.
Сокинони деҳа аз татбиқи корҳои ободонӣ изҳори қаноатмандӣ намуда, таъкид мекунанд, ки беҳтар гардидани роҳу инфрасохтори маҳаллӣ ба зиндагии ҳаррӯзаи мардум таъсири бевосита дошта, имкониятҳои рушди деҳаро бештар менамояд.
Дар маҷмӯъ, мумфаршкунии роҳҳои байнидеҳавӣ дар ноҳияи Айнӣ яке аз самтҳои муҳими корҳои созандагӣ ба шумор рафта, барои рушди устувори деҳот заминаи мусоид фароҳам меорад. Роҳи хубу муосир дастрасии аҳолиро ба марказҳои хизматрасонӣ, муассисаҳои иҷтимоӣ, бозорҳо ва дигар иншооти зарурӣ осон намуда, ба густариши робитаҳои иқтисодию иҷтимоӣ мусоидат мекунад.
Ҷашни 35-солагии Истиқлоли давлатии Ҷумҳурии Тоҷикистон барои мардуми кишвар на танҳо санаи муҳими таърихӣ, балки фурсати муносиб барои анҷом додани корҳои созанда ва гузоштани саҳми арзанда дар пешрафти Ватан мебошад.
Мумфаршкунии роҳи байнидеҳавии деҳаи Зоосун низ дар ҳамин замина амалӣ гардида, аз ҷумлаи иқдомҳои созандаест, ки ба беҳтар гардидани шароити зиндагии аҳолӣ ва рушди инфрасохтори маҳаллӣ равона шудааст.
Хадамоти матбуоти раиси ноҳияи Айнӣ
