Дар мавзеи Дашти Искодар маркази муосири хизматрасонии нақлиётӣ бунёд мегардад

Дар доираи корҳои созандагию ободонӣ ба муносибати ҷашни 35-солагии Истиқлоли давлатии Ҷумҳурии Тоҷикистон дар мавзеи Дашти Искодари ноҳияи Айнӣ сохтмони Маркази нуқтаи хизматрасонии нақлиётӣ идома дорад. Иншооти мазкур бо ташаббуси сокини деҳаи Искодар Пайрав Садриддинов бунёд гардида, барои ба роҳ мондани хизматрасонии муосир ва босифат ба ронандагону мусофирон ва дигар истифодабарандагони роҳ пешбинӣ шудааст.

Маркази мазкур бо дарназардошти мавқеи ҷуғрофии худ аҳамияти хос дорад. Мавзеи Дашти Искодар дар шоҳроҳи Душанбе–Самарқанд ҷойгир буда, ин роҳ яке аз масирҳои муҳими нақлиётии кишвар ба ҳисоб меравад. Ҳамарӯза тавассути ин шоҳроҳ шумораи зиёди воситаҳои нақлиёти дохилӣ ва хориҷӣ ҳаракат мекунанд. Аз ин рӯ, таъсиси маркази муосири хизматрасонии нақлиётӣ метавонад барои қонеъ гардонидани талаботи ронандагон ва мусофирон, беҳтар намудани сатҳи хизматрасонӣ ва фароҳам овардани шароити муносиб барои истифодабарандагони роҳ заминаи мусоид фароҳам оварад.

Тибқи нақша, дар марказ як қатор хизматрасониҳои зарурӣ ба роҳ монда мешаванд. Аз ҷумла, барои шустани воситаҳои нақлиёт нуқтаи махсуси шустушӯй ташкил гардида, ҳамзамон нуқтаи таъмири автомобилҳо фаъолият хоҳад кард. Дар ин ҷо ронандагон имконият пайдо мекунанд, ки ҳангоми ба миён омадани нуқсонҳои техникӣ аз хизматрасонии мутахассисон истифода баранд.

Ҳамчунин, дар марказ хизматрасонии ивази балон ва равғани муҳаррик ба роҳ монда мешавад. Ин навъи хизматрасонӣ барои ронандагоне, ки дар масири Душанбе–Самарқанд ҳаракат доранд, аз ҷумла барои воситаҳои нақлиёти сабукраву боркаш ва дигар намудҳои автомобилҳо, муҳим арзёбӣ мегардад. Ба ғайр аз ин, дар марказ корҳои рангубори воситаҳои нақлиёт ва дигар хизматрасониҳои марбут ба нигоҳубин ва таъмири автомобилҳо пешниҳод карда мешаванд.

Бо ба кор даромадани марказ як қатор масъалаҳои марбут ба хизматрасонии нақлиётӣ дар ин минтақа метавонанд осонтар гарданд. Ронандагон дигар барои анҷом додани корҳои одии техникӣ ва хизматрасонии автомобилӣ ба маҳалҳои дур рафтанро зарур намебинанд. Инчунин, таъсиси чунин иншоот барои фароҳам овардани ҷойҳои нави корӣ ва рушди соҳибкории маҳаллӣ низ мусоидат хоҳад кард.

Раиси ноҳияи Айнӣ Равшан Раҳимзода зимни боздид аз раванди корҳои сохтмонии иншоот бо созандагону масъулони марказ суҳбат намуда, ҷиҳати идомаи босифати корҳои сохтмонӣ ва ба талаботи муосир мутобиқ намудани иншоот тавсияҳои зарурӣ дод.

Зимни суҳбат таъкид гардид, ки бо назардошти дар шоҳроҳи Душанбе–Самарқанд ҷойгир будани марказ, пеш аз ҳама, ба намуди зоҳирӣ ва ободонии муҳити атроф таваҷҷуҳи ҷиддӣ зоҳир карда шавад. Бино ва иншооти хизматрасонӣ бояд бо тарҳи зебо ва ба муҳити атроф мувофиқ бунёд гардида, ба симои умумии минтақа таъсири мусбат расонанд. Тозагӣ, ободонӣ ва нигоҳдории муҳити атроф бояд яке аз самтҳои муҳими фаъолияти минбаъдаи марказ бошад.

Раиси ноҳия ҳамчунин ба масъалаи риояи талаботи экологӣ таваҷҷуҳи махсус зоҳир намуда, таъкид кард, ки ҳангоми фаъолияти марказ меъёрҳои экологӣ бояд қатъиян риоя карда шаванд. Аз ҷумла, масъалаҳои ҷамъоварӣ ва безараргардонии партовҳо, истифодаи дурусти об ҳангоми шустани воситаҳои нақлиёт, пешгирии ифлосшавии муҳити зист ва нигоҳ доштани тозагии гирду атроф бояд зери назорати доимӣ қарор дошта бошанд.

Равшан Раҳимзода инчунин зарурати ба роҳ мондани хизматрасонии босифатро таъкид намуда, аз масъулон даъват кард, ки ҳангоми фаъолияти марказ ба фарҳанги хизматрасонӣ ва муносибати хуш бо истифодабарандагон диққати махсус диҳанд. Зеро сифати хизматрасонӣ, муносибати хуби кормандон бо мизоҷон, риояи тартибу низом ва сари вақт анҷом додани корҳои фармоишӣ дар ҷалби муштариён ва баланд бардоштани эътимоди онҳо нақши муҳим дорад.

Масъулон ва созандагони иншоот иброз доштанд, ки корҳои сохтмонӣ бо маром идома дошта, барои дар муҳлати муайян ба анҷом расонидани сохтмон ва ба истифода додани марказ тамоми тадбирҳои зарурӣ амалӣ карда мешаванд.

Бунёди Маркази нуқтаи хизматрасонии нақлиётӣ дар мавзеи Дашти Искодар аз ҷумлаи иқдомҳои соҳибкории маҳаллӣ мебошад, ки метавонад ба рушди хизматрасониҳои замонавӣ, беҳтар гардидани инфрасохтори роҳ, фароҳам овардани ҷойҳои нави корӣ ва баланд бардоштани сатҳи хизматрасонӣ дар яке аз шоҳроҳҳои муҳими кишвар мусоидат намояд.

Иншооти мазкур дар доираи корҳои созандагию ободонӣ ба истиқболи 35-солагии Истиқлоли давлатии Ҷумҳурии Тоҷикистон бунёд шуда, пас аз мавриди истифода қарор гирифтан метавонад ба яке аз марказҳои муҳими хизматрасонии нақлиётӣ дар минтақа табдил ёбад.

Дар маҷмӯъ, ба роҳ мондани чунин марказҳо дар шоҳроҳҳои ҷумҳурӣ барои фароҳам овардани шароити мусоид ба ронандагон, рушди соҳибкории хурду миёна, беҳтар намудани сатҳи хизматрасонӣ ва боз ҳам ободу зебо гардидани минтақаҳои канори роҳ заминаи мусоид фароҳам меорад.

Хадамоти матбуоти раиси ноҳияи Айнӣ