Бахшида ба 35-солагии Истиқлоли давлатии Ҷумҳурии Тоҷикистон дар деҳаи Пинёни Ҷамоати деҳоти Фондарё клуби деҳа пас аз таъмиру таҷдид ба истифода дода шуд.
Дар доираи тадбирҳои созандагию ободонӣ ба ифтихори 35-солагии Истиқлоли давлатии Ҷумҳурии Тоҷикистон дар деҳаи Пинёни Ҷамоати деҳоти Фондарё клуби деҳа пас аз таъмиру таҷдиди пурра мавриди истифода қарор дода шуд.
Клуби деҳа бо ташаббус ва дастгирии мақомоти иҷроияи ҳокимияти давлатии ноҳияи Айнӣ таъмиру таҷдид гардида, бо таҷҳизоти зарурии фарҳангӣ таъмин карда шуд. Фароҳам гардидани чунин шароити муносиб барои аҳолӣ, бахусус ҷавонону наврасон, дар рушди фаъолияти фарҳангӣ, ташкили чорабиниҳои гуногуни маърифативу фарҳангӣ ва фароғатии сокинон заминаи мусоид фароҳам меорад.
Маросими ба истифода додани бинои навсозишудаи клуб дар фазои тантанавӣ ва бо иштироки намояндагони мақомоти иҷроияи ҳокимияти давлатии ноҳия, фаъолони ҷомеа ва сокинони деҳа баргузор гардид.
Дар ҷамъомади тантанавӣ раиси ноҳияи Айнӣ суханронӣ намуда, сокинони деҳаи Пинён ва кулли мардуми ноҳияро ба муносибати 35-солагии Истиқлоли давлатии Ҷумҳурии Тоҷикистон самимона табрик намуд.
Зимни суханронӣ таъкид гардид, ки Истиқлоли давлатӣ барои мардуми Тоҷикистон дастоварди бузурги таърихӣ буда, маҳз ба шарофати соҳибистиқлолӣ имрӯз дар тамоми гӯшаву канори мамлакат корҳои созандагиву ободонӣ вусъати тоза пайдо кардаанд. Бунёду азнавсозии иншооти иҷтимоӣ, аз ҷумла муассисаҳои фарҳангӣ, яке аз самтҳои муҳими сиёсати созандагии давлат ба ҳисоб меравад.
Ҳамзамон зикр карда шуд, ки солҳои соҳибистиқлолӣ барои рушди соҳаи фарҳанг дар кишвар имкониятҳои васеъ фароҳам оварда, бо мақсади баланд бардоштани сатҳи маърифатнокӣ ва завқи фарҳангии аҳолӣ дар шаҳру ноҳияҳои мамлакат пайваста муассисаҳои фарҳангӣ бунёд, таъмир ва таҷдид карда мешаванд.
Дар идомаи чорабинӣ таъкид гардид, ки имрӯзҳо дар саросари мамлакат ба муносибати ҷашни 35-солагии Истиқлоли давлатии Ҷумҳурии Тоҷикистон чорабиниҳои гуногуни фарҳангиву маърифатӣ, барномаҳои консертии идона ва дигар тадбирҳои оммавӣ баргузор гардида истодаанд. Дар ноҳияи Айнӣ низ ин санаи муҳими таърихӣ бо шукӯҳу шаҳомати хос таҷлил гардида, корҳои ободонию созандагӣ ва баргузории чорабиниҳои идона идома доранд.
Сокинони деҳа барои фароҳам овардани чунин шароити мусоид изҳори сипос намуда, иброз доштанд, ки мавриди истифода қарор гирифтани клуби навсозишуда ба рушди ҳаёти фарҳангии деҳа ва фароғати сокинон, махсусан ҷавонону наврасон, мусоидат хоҳад кард.
Дар фарҷоми чорабинӣ барномаи фарҳангии идона пешкаши иштирокчиён гардонида шуд. Сурудҳои ватандӯстона, рақсу тарона ва дигар намоишҳои фарҳангӣ фазои идонаи чорабиниро боз ҳам рангинтар намуда, муҳаббат ба Ватан, эҳтиром ба арзишҳои миллӣ ва ҳисси ифтихори шаҳрвандиро дар қалби иштирокчиён тақвият бахшиданд.
Мавриди истифода қарор гирифтани клуби деҳаи Пинён дар арафаи таҷлили 35-солагии Истиқлоли давлатии Ҷумҳурии Тоҷикистон боз як иқдоми созанда дар самти беҳтар намудани инфрасохтори иҷтимоӣ ва фарҳангии деҳот буда, аз таваҷҷуҳи пайваста ба рушди соҳаи фарҳанг ва фароҳам овардани шароити арзанда барои сокинон дарак медиҳад.
Хадамоти матбуоти раиси ноҳияи Айнӣ
Показать меньше
