Ба муносибати 35-солагии Истиқлоли давлатии Ҷумҳурии Тоҷикистон дар ноҳияи Айнӣ роҳпаймоии идона баргузор гардид, ки дар он намояндагони Ҳукумати Ҷумҳурии Тоҷикистон, мақомоти иҷроияи ҳокимияти давлатии вилояти Суғд, роҳбарияти ноҳия, фаъолон, собиқадорон, ҷавонон, аҳли зиё, кормандони ташкилоту муассисаҳо ва сокинони ноҳия фаъолона иштирок намуданд.
Роҳпаймоии идона санаи 3-юми сентябри соли 2026 дар доираи чорабиниҳои ҷашнӣ баргузор гардида, иштирокчиён бо рӯҳияи баланди ватандӯстӣ, ифтихори миллӣ ва арҷгузорӣ ба дастоварҳои даврони соҳибистиқлолӣ ба майдони баргузории чорабиниҳои идона раҳсипор шуданд.
Дар роҳпаймоӣ раиси ноҳияи Айнӣ Равшан Раҳимзода, намояндаи Ҳукумати Ҷумҳурии Тоҷикистон Исмоил Вализода, намояндаи мақомоти иҷроияи ҳокимияти давлатии вилояти Суғд Умедҷон Сафарзода, вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии №22 Қиёмиддин Давлатзода, инчунин роҳбарони сохторҳои давлатӣ, кормандони ташкилоту муассисаҳо, омӯзгорону табибон, намояндагони касбу кори гуногун, собиқадорони меҳнат, варзишгарон, ҷавонон ва дигар қишрҳои ҷомеа иштирок намуданд.
Иштирокчиёни роҳпаймоӣ бо парчамҳои давлатӣ, шиору овезаҳои идона ва рамзҳои миллии Ҷумҳурии Тоҷикистон фазои идонаи ноҳияро боз ҳам рангин гардониданд. Дар чеҳраи сокинон эҳсоси ифтихор аз Ватани соҳибистиқлол ва шодию фараҳ аз ҷашни бузурги миллӣ ба назар мерасид.
Роҳпаймоӣ ҳамчун рамзи ҳамбастагӣ, ваҳдати миллӣ ва ҷонибдории сокинон аз сиёсати созандаи давлату Ҳукумати Ҷумҳурии Тоҷикистон баргузор гардида, дар он намояндагони соҳаҳои гуногун дастовардҳои худро муаррифӣ намуданд.
Дар сафи пеши роҳпаймоӣ намояндагони мақомоти давлатӣ ва роҳбарони ташкилоту муассисаҳо ҳаракат намуда, баъдан кормандони соҳаҳои маориф, тандурустӣ, фарҳанг, варзиш, кишоварзӣ, саноат, соҳибкорӣ, ҷавонон ва дигар бахшҳои иҷтимоию иқтисодӣ бо тартиби муайян иштирок карданд.
Махсусан иштироки ҷавонон дар роҳпаймоӣ назаррас буд. Ҷавонони ноҳия бо дар даст доштани Парчами давлатӣ ва шиору навиштаҳои ватандӯстона садоқати худро ба Ватан, эҳтиром ба арзишҳои миллӣ ва омодагии худро барои саҳм гузоштан дар рушди Тоҷикистони соҳибистиқлол ифода намуданд.
Дар ҷараёни роҳпаймоӣ аз дастовардҳои ноҳияи Айнӣ дар даврони 35 соли соҳибистиқлолӣ ёдоварӣ шуда, саҳми сокинон дар корҳои созандагию ободонӣ, рушди иқтисодиву иҷтимоӣ, бунёду азнавсозии иншооти гуногун ва беҳтар гардидани сатҳи зиндагии аҳолӣ инъикос гардид.
Иштирокчиён таъкид менамуданд, ки Истиқлоли давлатӣ барои мардуми Тоҷикистон бузургтарин дастоварди таърихӣ буда, маҳз ба шарофати он барои эҳёи давлатдории миллӣ, таҳкими сулҳу субот ва ваҳдати миллӣ, рушди иқтисодию иҷтимоӣ ва баланд бардоштани мақоми кишвар дар арсаи байналмилалӣ шароити мусоид фароҳам омадааст.
Дар ин замина, сиёсати созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун омили муҳими таҳкими давлатдорӣ, таъмини сулҳу субот ва пешрафти кишвар арзёбӣ гардид.
Роҳпаймоии идона дар ноҳияи Айнӣ ба муносибати 35-солагии Истиқлоли давлатии Ҷумҳурии Тоҷикистон дар фазои баланди идона ва рӯҳияи ватандӯстона идома ёфта, ба чорабинии муҳими ҷамъиятию фарҳангӣ табдил ёфт.
Пас аз анҷоми роҳпаймоӣ иштирокчиён дар Варзишгоҳи марказии ноҳияи Айнӣ ҷамъ омада, дар чорабинии тантанавии бахшида ба 35-солагии Истиқлоли давлатии Ҷумҳурии Тоҷикистон иштирок намуданд.
Баргузории чунин чорабиниҳои идона дар ноҳия ба таҳкими ҳисси худшиносию худогоҳии миллӣ, тарбияи ватандӯстии насли наврасу ҷавон, арҷгузорӣ ба арзишҳои миллӣ ва таҳкими фазои сулҳу ваҳдат мусоидат менамояд.
Роҳпаймоии бошукӯҳ бори дигар собит намуд, ки сокинони ноҳияи Айнӣ бо эҳсоси баланди масъулиятшиносӣ, меҳанпарастӣ ва иттиҳоду сарҷамъӣ 35-солагии Истиқлоли давлатии Ҷумҳурии Тоҷикистонро истиқбол намуда, барои ободии Ватан ва пешрафти Тоҷикистони соҳибистиқлол саҳми арзандаи худро мегузоранд.
Хадамоти матбуоти раиси ноҳияи Айнӣ
Показать меньше
